11-уми сентябр дар толори бинои “Шарқи озод” аз тарафи Муассисаи давлатии рӯзномаи “Ҷавонони Тоҷикистон” бахшида ба 90-солагии рӯзномаи мазкур ҳамоиши ҷумҳуриявии рӯзноманигорони ҷавон ва собиқадорони соҳа таҳти унвони “Гуфтугӯи ду насл” баргузор гардид.

Дар ибтидои ҳамоиш китоби тозаэҷоди таҳиянамудаи ҳайати эҷодии рӯзномаи “Ҷавонони Тоҷикистон” бо номи “Пири дилҷавон” ва нашри махсуси рӯзнома дар ҳаҷми 90 саҳифа ба намоиш гузошта шуд. Дар ин китоб аз нахустин лаҳзаҳои чопи рӯзномаи “Ҷавонони Тоҷикистон”, яъне аз 5 апрели соли 1930 то ба имрӯз матолибҳои рӯзноманигорони ин даргоҳ, инчунин сармуҳаррирони он, ки шумораашон то ба имрӯз 33 нафарро ташкил медиҳад, дарҷ шудааст.

Баъди намоиши китоби “Пири дилҷавон” ва нашри махсуси 90 саҳифагии рӯзнома ҳамоиши “Гуфтугӯи ду насл” оғоз гардид.

Дар ҳамоиши мазкур раиси Кумитаи кор бо ҷавонон ва варзиши назди Ҳукумати кишвар Абдулло Раҳмонзода, сармуҳаррири рӯзномаи “Ҷавонони Тоҷикистон” Шодихони Назар, сармуҳаррирони собиқи рӯзнома Ато Ҳамдам ва Бахтовар Каримов, собиқадорони соҳа Иброҳим Усмонов, Умаралӣ Сафаралӣ, Маҳмудҷон Усмонов, инчунин рӯзноманигорони ҷавон ва донишҷӯёни бахшҳои рӯзноманигории донишгоҳҳои кишвар иштироку суханронӣ намуданд.

Нахуст Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ намуда, иброз дошт: “Ҳамоише, ки имрӯз мову шумо ба хотираш ҷамъ омадаем, аз таърихи нашрияи бузурге қисса мекунад. Таърихи 90-сола. Таърихе, ки бидуни шакку тардид нуқта ба нуқта дар заминаи ҳақиқату бурҳонҳо навишта шудааст ва имрӯз дар шакли китоб бо ташаббуси аҳли эҷоди рӯзнома, махсусан ҳайати эҷодии ҷавони рӯзномаи “Ҷавонони Тоҷикистон” рӯи чоп омад. Ин китоб аз 90 соли рӯзномае ба хонанда маълумот медиҳад, ки дар ҳар саҳфааш ҳаёти мардуми тоҷикро дар шаклу тасвирҳои гуногун, дар шароити ҳархела ва дар шаклҳои мухталифи ҳукмронию давлатдорӣ инъикос мекарду мекунад”.
Номбурда ҳамчунин афзуд: “Рӯзномаи “Ҷавонони Тоҷикистон” сафинаест баранда ба соҳили мурод. Чунин унвон додани ин нашрия ба мақсад бисёр мувофиқ аст. Тӯли 90 сол ин ҷарида як зумраро то ба баландтарин мақом бурда расонд. Ба эшон роҳи бунёди давлату давлатдориро омӯзонд. Иддаи дигарро парда аз рӯ бардошту дилсиёҳию кинатузиашонро ба ҷомеа бозгӯ кард. Дар ҳама ноҷуриҳои ҳаёт бо мардум буд. Хосатан бо ҷавонон. Бо ҷавонон будану онҳоро сарфароз намудан, як шодии онҳоро даҳчанд кардан, кори рӯзномаи “Ҷавонони Тоҷикистон” буд ва хоҳад монд”.

Дар идомаи ҳамоиш сармуҳаррири рӯзномаи “Ҷавонони Тоҷикистон” Шодихони Назар баромад карда, аз ҷумла қайд намуд: “Ҳама аз ин даргоҳ миннатдоранд. Ҳама таъкид мекунанд, ки ҳеҷ буданд, “Ҷавонон...” онҳоро дар оғӯшаш гирифта, модарвор тарбия карду ба камол расонд. Ҳама гуфтанд, ки барои рӯзноманигори муваффақ шуданашон, шоири бузург шуданашон, нависандаи забардаст шуданашон, ходими давлатӣ шуданашон, дипломати байналмилалӣ шуданашон, чеҳраи сиёсӣ шуданашон, дар ҷомеа мавқеъ пайдо карданашон, соҳиби мукофотҳо шуданашон, умуман касе шуданашон нақши рӯзномаи “Ҷавонони Тоҷикистон” бузург аст. Ҳама аз “Ҷавонони Тоҷикистон” ба мақоми болотар рафтаанд. Шояд барои ҳамин хизматҳояш дӯсташ медоранд. Нафаре пайдо нашуд, гӯяд, ки ман “Ҷавонони Тоҷикистон” -ро сохтам. Ҳама гуфтанд, ки “Ҷавонон...” онҳоро сохт. Инак, ин пири хирад ба 90 қадам ниҳод. 90 сол дораду ҳоло ҳам ҷавон аст. 90 сол дораду ҳоло ҳам ҷӯшу хурӯши ҷавонӣ дорад. 90 сол дораду дилаш ҷавон аст. 90 сол дораду мисли ҷавони 18 сола акнун баҳри хизмат ба падару модар ва саҳм гузоштан дар тарбияи насли наврас аз нав камари ҳиммат бастааст. 90 сол дораду аз ҷавонию ҷавонон гуфтан мехоҳад”.

Сипас, сармуҳаррири собиқи рӯзнома Ато Ҳамдам баромад намуда, аз лаҳзаҳои нахустини кории худ нақл карданду изҳори шодӣ намуданд: “Ман аслан хатмкардаи мактаби ҳизбӣ мебошам, аммо маро дар рӯзномаи “Комсомоли Тоҷикистон” (ҳоло “Ҷавонони Тоҷикистон”) ба ҳайси сармуҳаррир таъин намуданд. Ман командаи худро доштам. Маҳз меҳнат ва дастгирии онҳо буд, ки тӯли 11 сол дар ин рӯзнома кор кардам. Ҳоло, ки ман дар ин ҷо собиқадорони рӯзнома, кормандони пешинро дидам, хеле шод гардидам. Рӯзномаи “Ҷавонони Тоҷикистон” таърихи тиллоие дар умри ман аст”.

Баъди маърузаву баромади собиқадорон ва кормандони рӯзномаи “Ҷавонони Тоҷикистон” аз тарафи котиби масъули рӯзнома Хуршед Мавлонов изҳороти рӯзноманигорони ҷавон вобаста ба ҷонибдорӣ аз пешниҳоди Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба номзадии Президенти Ҷумҳурии Тоҷикистон ироа гардид.



Дар охири ҳамоиши мазкур аз ҷониби Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар собиқадорон ва кормандони имрӯзи рӯзнома бо сипосномаи кумита қадрдонӣ гардиданд.