Вақти он расидааст, ки модели таълимдиҳӣ тағйир дода шавад. Ин нуктаро Гулзода Маҳмадшоҳ, ректори Донишгоҳи давлатии тиббии Тоҷикистон ба номи А. Сино имрӯз зимни нишасти хабарии донишгоҳ баён сохт ва дар идома гуфт:

-Таҳсилоти муосири эътирофи ҷаҳонидошта водор месозад, ки барои донишҷӯ омӯхтан, омузонида шавад. Дар назди омӯзгор вазифа гузошта мешавад, ки донишҷӯро бештар барои худомӯзӣ, худташаккулдиҳӣ ва рушди фикрронии аналитикӣ омода созад.

Ба таъкиди ӯ дар баргузории дарсҳои амалӣ омӯзгор нақши роҳнамо-мураббиро иҷро намуда, донишҷӯëн бо истифодаи технологияи муосири таълимӣ ба ҳалли мустақилонаи масъалаҳои клиникии тиббӣ машғул мешаванд. Ин яке аз усулҳои муосири таълимдиҳии эътирофгардида аст, ки дар донишгоҳҳои бонуфузи ҷаҳонӣ васеъ ҷорӣ шудааст.