Бо дастури Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 11-уми январи соли равон Ширкати саҳҳомии холдингии кушодаи “Барқи тоҷик” “лимит”-и барқро дар тамоми минтақаҳои кишвар аз байн бардошт. Ин супориши Роҳбари давлат дар пайи боришоти барф ва сардиҳои охир дар кишвар сурат гирифт. Тибқи ин дастур Ширкати саҳҳомии холдингии кушодаи “Барқи тоҷик” вазифадор гардидааст, ки бо истифода аз тамоми захираву имконият неруи барқро дар тамоми қаламрави мамлакат бе маҳдудият таъмин намояд.

Аз байн бардоштани “лимит”-и барқ дар кишвар то кай идома меёбад? Он умуман бардошта мешавад ва ё дубора ҷорӣ мешавад? Дар ин маврид Нозирҷон Ёдгорӣ, сухангӯи “Барқи тоҷик” гуфт, ки бидуни маҳдудият додани барқ дар тамоми минтақаҳои кишвар то охири моҳи январи соли равон идома хоҳад кард, вале тасмими баъдӣ пас аз мушаххас намудани корҳои омӯзишӣ гирифта мешавад.

- Рости гап, ҳоло инро ҳеҷ кас намедонад, ки то кай бардоштани маҳдудияти барқ дар кишвар амал мекунад. Вале то охири моҳи январ мо захираҳои обии энергетикиро як бори дигар ҳисоб карда, мебароем ва баъдан хулосаи аниқ бароварда мешавад. Дида мебароем, ки чӣ қадар об хароҷот шудаасту чӣ қадар боқӣ мондааст, баъдан ба ВАО пешниҳод мекунем, - гуфт сухангӯи ин ниҳод Н. Ёдгорӣ.

СОКИНОН ВА БАРҚ

Имсол бо фарорасии фасли зимистон масъулини “Барқи тоҷик” гуфтанд, ки аз сабаби норасоии мавсимии захираҳои обу энергетикӣ, дар бархе аз минтақаҳои кишвар танҳо шабона барқ хомӯш мешуд.

- То ин вақт бо сабаби норасоии мавсимии захираҳои обу энергетикӣ, ки аз рӯи ҳисоби мутахассисон, дар давраи тирамоҳу зимистон ба қадри зиёда аз 1 миллиард квт. соат пешгӯӣ шудааст, таъмини барқ дар баъзе минтақаҳои мамлакат танҳо шабона аз соати 22:00 то 05:00 маҳдуд карда мешуд, - иттилоъ доданд аз “Барқи тоҷик”.

Сокинони кишвар аз чунин тасмим истиқболи гарм мекунанд ва аз он хушҳоланд, ки маҳдудияти барқ бардошта шуд. Онҳо мегӯянд, ки дар ҳолати вуҷуд доштани барқ, махсусан дар фасли сармо чунин дастгирии Ҳукумати кишвар барояшон муҳим аст.

Маҳина Убайдова як сокини шаҳри Ваҳдат мегӯяд бисёр хуб аст, ки чунин тасмим гирифта шуд. Ба гуфтаи ӯ, воқеан ҳам имсол дар кишвар сардие омадааст, ки чанд соли ахир ба назар намерасид ва дар ҳамин ҳолат барои минтақаҳои дурдаст будани барқ зарур ва муҳим аст.

- Воқеан ҳам чанд рӯзи ахир мушоҳида мекунем, ки барқро хомӯш намекунанд. Оилаи мо калон аст ва дар як ҳавлӣ чанд хонавода зиндагӣ мекунем, вале хонаи хоби мо бухорӣ надорад, ки онро истифода кунем. Дар як хонае бо ҳамсару фарзандонам танҳо аз бухории барқӣ истифода мебарем. Вале дар ҳолати набудани барқ он ҷо зиндагӣ кардан мушкил аст, махсусан дар сардиҳои имсола.

Ҳамзамон, Маҳина мегӯяд, дар ин сардиҳои зимистон, ки фарзандонашон аз мактаб ҷавобанду дар хонаанд, будани барқ бисёр хуб аст.

- Онҳо дар ин рӯзҳо, ки берун баромада наметавонанд, ақаллан ба тамошои филмҳои тасвирӣ ва омӯзиш машғул мешаванд ва ҳамин гуна вақти худ-ро мегузаронанд,-илова кард Маҳина.
Сокина Мамадова, сокини ноҳияи Ишкошими Вилояти Мухтори Кӯҳистони Бадахшон низ аз ин тасмими Роҳбари давлат ба хубӣ истиқбол карда, гуфт:

“Воқеан ҳам дар Бадахшон, ки яке аз минтақаҳои сарди кишвар ба шумор меравад ва чанд шабонарӯзи ахир сардӣ то 35 дараҷа ва зиёда аз он низ расида буд, дар ин рӯзҳо бе барқ будан бисёр ҳам душвор аст. Ҳукумати кишвар хуб кард, ки маҳдудияти барқро аз миён бардошт. Кош чунин ҳолат ҳамасола давом кунад”.

Сокина умедвор аст, ки бо ба кор андохтани агрегатҳои боқимондаи НБО “Роғун” чунин ҳолат ҳамасола ба роҳ монда мешавад.

Қаблан низ Пешвои миллат муҳтарам Эмомалӣ Раҳмон зимни суханронӣ бо роҳбарону фаъолон ва сокинони шаҳри Норак гуфта буданд, ки дар кишвар маҳдудияти барқ ҳаст, вале он муваққатист.

“Ҳоло бо истифода аз рӯзҳои мусоид дар кишвари мо низ маҳдудияти интиқоли барқ амал карда истодааст. Вале ин ҳолат муваққатӣ буда, ба хотири дар фасли сармо бо барқ пурра таъмин намудани аҳолӣ ҷорӣ шудааст”, - гуфта буданд Президенти кишвар.

“БАРҚРО САРФАКОРОНА ИСТИФОДА БАРЕМ”

Чанд рӯзи охир дар қаламрави ҷумҳурӣ боришоти зиёди барф ба амал омад ва ҳарорат аз нишондиҳандаи миёнаи иқлимӣ хеле паст шуд. Чунин рӯзҳо дар фаъолияти хоҷагии коммуналии шаҳру ноҳияҳо ва зиндагии рӯзмарраи аҳолӣ мушкилиҳо пеш овард ва талабот низ дар истифодаи неруи барқ бениҳоят зиёд гардид.

Ин аст, ки аз ҷониби “Барқи тоҷик” ишора шудааст, ки интиқоли бемаҳдудияти неруи барқ бо назардошти афзоиши талабот дар рӯзҳои сард аз як тараф боиси хароҷоти иловагии оби обанбори НБО “Норак” гашта, аз тарафи дигар дар ҳолати риоя нагардидани тадбирҳои сарфаҷӯии неруи барқ ба сарбории шабакаҳои барқӣ, тарансформаторҳо ва садамаҳо дар системаи энергетикаи ҷумҳурӣ оварда мерасонад.

Аз ин лиҳоз, “Барқи тоҷик” аз муштариён хоҳиш намудааст, то ки ҷавобан ба ин ғамхориҳои Ҳукумати мамлакат неруи барқро сарфакорона ва мақсаднок истифода намоянд.

Маҳз истифодаи сарфакоронаи неруи барқ аз тарафи ҳар як муштарӣ имкон медиҳад, ки таъминоти тамоми соҳаҳои мамлакат ва аҳолӣ бо неруи барқ беҳтар гардад”, - таъкид шудааст дар як муроҷиатномаи ин ширкат.

Пешвои миллат муҳтарам Эмомалӣ Раҳмон дар паёму вохӯриҳои хеш ба соҳаи энергетика таваҷҷуҳи хосса намуда, махсусан дар бахши расидан ба истиқлолияти энергетикӣ, риояи фарҳанги сарфаю сариштакорӣ дар истифодаи ин сарвати миллӣ ва интиқоли неруи барқ ба кишварҳои ниёзманди энергетикӣ таъкид мекунанд. Президенти кишвар ҳамеша аз мардум даъват ба амал меоранд, ки барои кам кардани талафоти неруи барқ ва истифодаи сарфакоронаи он аз таҷҳизоти каммасрафи барқӣ истифода намоянд.

Нозирҷон Ёдгорӣ сухангӯи “Барқи тоҷик” низ чанде қабл гуфта буд, ки то пурра ба кор андохтани тамоми агрегатҳои НБО Роғун мо бояд барқро сарфакорона истифода барем, то дар рӯзҳои сард ба бебарқӣ гирифтор нашавем.