Кумита ҷоизадорони Бозиҳои олимпиро аз 10 то 20 ҳазор доллар қадрдонӣ мекунад

Бо пуштибонӣ аз сиёсати созандаву бобарори варзишпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон ва дастгириҳои рӯзафзуни Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо соҳибкорону ташаббускорони ватанӣ тасмим гирифтааст, ки ғолибону ҷоизадорони Бозиҳои тобистонаи олимпии Париж - 2024 ро бо мукофотпулӣ қадршиносӣ намояд.

Дар ин бора маркази таҳлил ва иттилооти дастгоҳи марказии Кумита хабар медиҳад.

Бино ба иттилои манбаъ, дар пайи ин иқдом ғолиби ҷойи аввал бо 20 000 доллар, ғолиби зинаи дуюм бо 15 000 доллар ва ғолиби мақоми сеюм бо 10 000 доллар мукофотпулӣ ҳавасманд карда мешаванд.

Гуфта мешавад, иқдоми мазкур барои боз ҳам баланд бардоштани руҳияи варзишгарони кишвар мусоидат карда, ҷиҳати расидан ба ҳадафу мақсадҳои гузошташудаи онҳо замина мегузорад.

Ёдовар мешавем, ки ғолибону ҷоизадорони Бозиҳои тобистонаи олимпии Париж -2024 бо Ҷоизаи Президенти Ҷумҳурии Тоҷикистон, аз ҷумла барои ғолиби ҷойи якум 300 000 сомонӣ, ғолиби мақоми дуюм 250 000 сомонӣ ва ғолиби зинаи сеюм 200 000 сомонӣ мукофотонида мешаванд. Ҳамчунин, варзишгароне, ки ҷойҳои ифтихориро сазовор мегарданд, аз ҷониби раиси шаҳри Душанбе муҳтарам Рустами Эмомалӣ бо хонаҳои истиқоматии 3, 2 ва 1 ҳуҷрагӣ қадршиносӣ хоҳанд шуд.