26 ноябр Сарвазири мамлакат Қоҳир Расулзода ҳамоҳ бо раиси вилояти Хатлон Давлаталӣ Саид ва раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода дар ноҳияи Шамсиддин Шоҳин бинои ду ошёнаи Маркази ҷавонони ноҳияро мавриди баҳрабардорӣ қарор доданд.

Ифтитоҳи ин бино дар доираи сафари Сарвазири мамлакат ба ноҳияҳои Темурмалик, Восеъ, Шамсиддини Шоҳин ва шаҳри Кӯлоби вилояти Хатлон сурат гирифт, ки гуфта мешавад ин сафар бо мақсади иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон роҳандозӣ гардида аст.

Тавре аз дафтари матбуоти Кумитаи кор бо ҷавонон ва варзиш иттилоъ доданд, сохтмони бинои Маркази ҷавонони ноҳияи Шамсиддини Шоҳин соли 2020 оғоз гардида, бо харҷи 3 226 540 сомонӣ бо муосиртарин шароит баҳри ҷавонони ноҳия дар доираи Барномаи корҳои ободонӣ бахшида ба ҷашни 35-солагии Истиқлоли давлатии Ҷумҳурии Тоҷикистон сохта шуда, мавриди истифода қарор гирифт.

Бинои мазкур дар масоҳати 1500 метри мураббаъ бунёд гардидааст. Дар ошёнаи якум 3 ҳуҷраи корӣ барои таълимгирандагон ва дар ошёнаи дуюм 2 ҳуҷраи корӣ, 2 маркази омӯзишӣ ва маҷлисгоҳ ҷойгир мебошад.