Ин мушкил ҳалли худро пайдо мекунад?

Раиси шаҳри Душанбе муҳтарам Рустами Эмомалӣ зимни ҷаласаи ҷамъбастии солона дар баробари дигар мушкилоти пойтахт аз норасоиҳои хизматрасонии ширкатҳои мобилӣ низ интиқод кард. Шаҳрдори Душанбе аз сатҳи пасти хизматрасонии ширкатҳои мобилӣ дар Тоҷикистон интиқод карда, ба мусъулин дастуру супориш додааст, ки дар муддати кӯтоҳ камбудиҳои ҷойдоштаро бартараф кунанд.

Ӯ ҳангоми баррасии фаъолияти ширкатҳои мобилӣ гуфтааст, хизматрасониҳо дар ин самт ба таври зарурӣ ба роҳ монда нашудааст ва рӯнамоиҳоро аз сатҳу сифати фаъолият дида бештар арзёбӣ кардааст.

“Дар бисёри ҳолатҳо он имконоте, ки ширкатҳои мобилии Тоҷикистон дар рӯнамоиҳо (рекламаҳо)-и хизматрасониҳояшон инъикос менамоянд, ба воқеият ҷавобгӯ нест”,- изҳор доштааст раиси шаҳри Душанбе муҳтарам Рустами Эмомалӣ.

Шаҳрдори Душанбе барои бартараф намудани камбудиҳои ҷойдошта дар кӯтоҳтарин муддат ба масъулин дастуру супоришҳои қатъӣ додааст.

Воқеан ҳам, тибқи радабандиҳои ҷаҳонӣ, ки ҳамасола гузаронида мешавад, дар Тоҷикистон суръати интернети мобилӣ дар қиёс бо як соли пеш боз ҳам сусттар шудааст. Дар радабандии нави “Speedtest Global Index”, ки суръати интернети мобилиро дар 138 кишвари ҷаҳон таҳқиқ кардааст, Тоҷикистон бо суръати 7,57 мегабит дар сония (Mbps), дар мавқеи 134-ум миёни ин кишварҳо қарор гирифтааст.

Ин нишондод нисбат ба 1 соли қабл 5 зина поинтар аст. Дар радабандии соли қабл Тоҷикистон дар ҷойи 129-ум қарор дошт. Дар ҳамин гузориши “Speedtest Global Index” аз моҳи ноябр, аз рӯи интернети ноқилӣ дар Тоҷикистон вазъ нисбатан беҳтар буда, байни 181 кишвар Тоҷикистон бо суръати 16.63 мегабит дар сония дар ҷойи 123-юм аст.

Аз миёни кишварҳои Осиёи Марказӣ Ӯзбекистон дар ин радабандӣ дар зинаи 119 қарор дорад ва суръати интернети мобилӣ дар ин кишвар 13,67 ва интернети ноқилӣ 36.23 мегабит дар сония гуфта шудааст. Афғонистон дар мавқеи охирин қарор дорад.

УМЕДВОРИИ СОКИНОН АЗ БЕҲТАР ШУДАНИ САТҲИ ХИЗМАТРАСОНӢ

Вале интизориҳои мардум аз ин интиқоди шаҳрдори ҷавон чӣ гуна аст ва мушкиле, ки тӯли чанд сол вуҷуд дорад, воқеан ҳам метавонад ҳалли худро ёбад?
Сокинони кишвар умедворӣ аз он доранд, ки ин интиқоди раиси шаҳр муҳтарам Рустами Эмомалӣ ба маврид буда, воқеан ҳам ба соҳибони ширкатҳои мобилӣ таъсир мерасонад ва онҳо мушкилҳоро ҳаллу фасл мекунанд.

“Интиқоди шаҳрдори Душанбе Рустами Эмомалӣ дар мавриди сатҳи пасти хизматрасониҳои ширкатҳои мобилӣ дар Тоҷикистон қобили қабул аст. Воқеан ҳам чунин мушкилҳо дар хизматрасониҳои мобилии мо вуҷуд доранд. Фикр мекунам, ин мушкилҳо агар дар кӯтоҳтарин муддат ҳам набошад, вале оҳиста-оҳиста ҳалли худро меёбанд. Чун ҳар дастуру супоришҳое, ки аз ҷониби шаҳрдорӣ ба ширкатҳо дода мешавад, ҳатман иҷро мешаванд ва роҳи ҳалли худро меёбанд”,- мегӯяд Шервони Умриддин.

Меҳринисо Бегова, ки яке аз истифодабарандагони фаъоли телефони мобилист, мегӯяд ба ҳар мушкиле, ки раиси шаҳр расидагӣ мекунад, ҳатман ҳал мешавад ва ин мушкил низ ҳалли худро меёбад.

“Мо умедвор ҳастем, ки пас аз дастуру супоришҳои раиси шаҳр ин мушкил дар муддати кӯтоҳ бартараф хоҳад шуд. Чун чандин тасмимоти муҳими ахире, ки раиси шаҳр гирифта буд, ҳалли худро ёфтанд. Мо умедворем, ки сатҳи хизматрасонии ширкатҳои мобилӣ баланд гардида, мушкилоти ҷойдошта ҳал мешаванд”, - гуфт Меҳринисо.

Ин интиқоди раиси шаҳр дар ҳолест, ки ҳамарӯза сокинони кишвар аз сатҳу сифати хизматрасониҳо, махсусан суръати сусту нархи гарони интернет дар кишвар шикоят мекунанд.

НИГАРОНӢ

Ахиран Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон низ зимни ироаи Паёми солонаи хеш бо нигаронӣ аз истифодаи зиёди телефонҳои мобилӣ ва пардохти зиёди маблағ барои телефонҳои мобилӣ изҳори нигаронӣ намуд. Президенти кишвар иброз намуд, ки сокинони кишвар давоми 10 сол ба маблағи 30 миллиард сомонӣ гап задаанд ва инро ташвишовар хонд.

Аз ҷумла, Президенти кишвар иброз доштанд, ки “Тайи 10 соли ахир аҳолии Тоҷикистон барои дастрасӣ ба алоқаи мобилӣ зиёда аз 30 млрд сомонӣ сарф кардааст. Ин қариб 3 млрд доллар буда, маблағи кам нест. Бо ин маблағ мо неругоҳи Роғунро сохта метавонем”.

Ба таъкиди Сарвари давлат, агар шумораи муштариёни алоқаи телефонӣ соли 1991 ҳамагӣ 277 ҳазор нафарро ташкил карда бошад, пас дар соли 2021 шумораи танҳо муштариёни алоқаи телефонии мобилӣ ба беш аз 8 миллион нафар расидааст.

Ҳамзамон Президенти кишвар аз он изҳори нигаронӣ кард, ки аҳолӣ ҳамасола ба операторони мобилӣ, ки 90%-ашон ширкатҳои хориҷиянд, 3 млрд сомонӣ пардохт мекунад ва илова намуд, ки мо бояд фарҳанги дурусти истифодаи телефонҳои мобилиро дошта бошем.

“Моро лозим аст, ки фарҳанги истифодаи телефонҳои мобилиро бознигарӣ кунем. Ба ин хурсанд шудан лозим нест, оянда мушкилоти ҷиддӣ пайдо шуданаш мумкин аст, гирифторӣ ба бемориҳо, аз ҷумла саратони мағзи сар”, - иброз доштанд Сарвари давлат.

Роҳбари давлат аз аҳолӣ даъват намуд, ки наврасону кӯдакони хурдсолро, ки “телефону компютер бозичаҳояшонро иваз намудааст” эҳтиёт кунанд.
Ин гуфтаҳои Президенти кишварро раиси Ассотсиатсияи операторони алоқаи мобилӣ Ғафур Эркаев дастгирӣ намуда, мегӯяд воқеан ҳам аксарият аз телефонҳои мобилӣ ғайримақсадноку ноогоҳона истифода мебаранд.

“Масалан, шахс занг зада, дар диапазони овозҳо 30-40 дақиқа гуфтугӯ мекунад.

Мафҳуме ба мисли одоби мобилӣ вуҷуд дорад, ки мо ба корбарон тавсия медиҳем. Аммо мардуми мо суханпардозиро дӯст медоранд, ки ба тафаккури шарқӣ иртибот дорад”, - иброз дошт ӯ.

Ҳамзамон ӯ инро низ қабул дорад, ки ҷаҳони муосирро бе истифодаи телефон ва интернет тасаввур кардан душвор аст.
Вале бо вуҷуди ин, набояд фаромӯш кард, ки Ҷумҳурии Тоҷикистон дар солҳои 2000 аз лиҳози рушди бозори алоқаи мобилӣ на танҳо дар паҳнои Осиёи Марказӣ, балки миёни кишварҳои ИДМ низ пешсаф буд.

Бозори он замон ба операторони мобилӣ имкон медод, ки пул кор карда, қисмате аз даромадро ба рушди зерсохтор равона созанд.
Ҳамзамон, Тоҷикистон аввалин шуда дар Осиёи Марказӣ шабакаҳои 3G-ро роҳандозӣ намуда, инчунин яке аз аввалинҳо дар оғози кор бо технологияи 4G маҳсуб меёфт.

Ба туфайли хидматрасонии босифат ба муштариён, тарофаҳои нисбатан паст ва муҳити бештар озодтар даромади ширкатҳои мобилӣ мунтазам афзоиш ёфт.
Ҳоло истифодабарандагони Интернет дар Ҷумҳурии Тоҷикистон зиёда аз 4,2 миллион нафарро ташкил медиҳанд. 

Вале тӯли чанд соли ахир нигаронии мардум аз суръати пасти интернет ва сифати пасти хизматрасониҳои ширкатҳои мобилӣ зиёд ба назар мерасад. Рӯзе нест, ки мо дар шабакаҳои иҷтимоӣ шикояти нафареро оид ба ин мушкилот во нахӯрда бошем. Пас, умед ба он мебандем, ки ин интиқоди шаҳрдорӣ ба ширкатҳои мобилӣ таъсири худро мерасонад ва мушкилоти ҷойдошта ҳалли худро меёбанд.