Интихобот нишони давлати демократӣ ба ҳисоб меравад. Тибқи қонунҳои амалкунанда имсол интихоботи президентӣ дар Ҷумҳурии Тоҷикистон рӯзи 11-уми октябр баргузор мегардад. Мусаллам аст, ки дар ҳар як интихобот назари нав, барномаҳои нав рӯйи кор меоянд, ки аз он барномаҳо мардум интизориҳои зиёд доранд. Доир ба интихоботи навбатӣ аз ҷавонони кишвар, ки дар самтҳои гуногун кору фаъолият мекунанд, пурсишеро бо саволи “Аз интихоботи президентӣ чӣ интизориҳо доред?” анҷом додем.  


Мунисаи ЗАФАР, омӯзгор;
- Назари ман дар ин бобат одист. Ҳама мехоҳад, сатҳи зиндагиаш хуб бошад. Дар ҳама хонаводаҳо сериву пурӣ бошад. Ин на танҳо аз шахси интихобкардаи мо вобастагӣ дорад, балки дигарон ҳам бояд кӯшиш намоянд, то ҷомеаи мо пеш равад. Яъне боз ҳам аз ҳозира сатҳи зиндагӣ хубтар гардида, ҳар як хонавода зиндагии шоистаро соҳиб гардад. Инчунин дар ин баробар дар бозорҳо арзонӣ ва нарху наво барои ҳар як нафар дастрастару арзонтар бошад, то ки ҳамагон дар зиндагӣ ба каму костиҳо камтар рӯбарӯ гарданд.


 Мусриф АМОНШОЕВ, рӯзноманигор;
- Ҳукумати мамлакат то ин дам барои ҷавонон бисёр имкониятҳоро фароҳам оварданд. Фикр мекунам, баъд аз интихоботи президентӣ боз рафтуомад, олимпиадаҳо ва озмунҳои байналмилалӣ барои ҷавонон зиёдтар ташкил гардида, ҷавонони соҳибистеъдоди мо ҳунару маҳорати худро ба мардуми ҷаҳон нишон дода, ватани азизамонро аз имрӯз бештару хубтар муаррифӣ мекунанд.


 Некрӯз АЛИЕВ, донишҷӯ;
- Аз интихоботи навбатии президентӣ интизориҳои зиёд дорам. Интизории ман ободии деҳаҳои кишвар ва арзонии нарху наво дар деҳоту дигар минтақаҳои кишвар аст. Зеро худ аз деҳот ҳастам ва медонам, ки сатҳи зиндагии мардум чи гуна аст. Дар деҳот нафарони зиёд ҳавас доранд, ки дар шаҳр ва дар хориҷа таҳсили илм кунанд, аммо аз сабаби паст будани шароиташон таҳсили худро идома дода наметавонанд. Лекин боварӣ дорам, ки сатҳи зиндагии мардум боз ҳам аз имрӯз беҳтар мегардад, зеро ҳадафи асосии барномаҳои пешазинтихоботии ҳар як ҳизби сиёсӣ якумдараҷа маҳз ба сатҳи некуаҳволии мардум равона гардидааст.


Дилрабо АЛФАТШОЕВА, магистранти ДДФСТ;
- Асосан мардум дар оромиву осоиштагӣ зиндагӣ кунанд, бас аст. Хоҳони онам, ки оромиву сулҳу субот дар кишвар пойбарҷо бошад. Боз дар баробари дигар интизориҳоям озодии сухани бештарро ба журналистон баъди интихоботи навбатии президетӣ интизорам ва гумон мекунам, ин барои як давлати соҳибистиқлолу дунявӣ озодӣ нисбати журналистон кори беҳтарин аст. Зеро бо озодии бештари журналистон мо метавонем, дарди ҷомеаро ба Ҳукумат расонему ба ин васила дар рушду тараққиёти ҳаёти ҷамъият саҳми арзанда гузорем.


Маъруф АБДУҶАББОРОВ, корманди МТС;
- Фикр мекунам, баъд аз интихобот давраи татбиқи сифатии барномаҳои рушди инноватсионии Ҷумҳурии Тоҷикистон, аз ҷумла татбиқи консепсия ва стратегияи “иқтисодиёти рақамӣ” дар кишвар, татбиқи технологияҳои рақамӣ дар ҳамаи соҳаҳои иҷтимоиву иқтисодӣ, тавсеаи “ҳукумати электронӣ” фароҳам хоҳад омад. Ҳафт соли минбаъда барои Президенти Тоҷикистон ва Ҳукумати мамлакат як соли бисёр мушкили ҳисоботӣ мебошад. Тоҷикистон бояд то соли 2030 ба тамоми ҳадафҳои дар Стратегияи миллии рушд барои давраи то соли 2030 омада ноил гардад, ки яке аз онҳо аз кишвари аграрӣ ба индустриалӣ — аграрӣ табдил ёфтани кишварамон мебошад.


Алишер РАҲМОНӢ, котиби матбуотии Маркази иттилоот ва таҳлили МДТ "Донишгоҳи давлатии Хуҷанд ба номи академик Бобоҷон Ғафуров"
- Дидгоҳ ва хостаҳои интихобкунандагони интихоботи қарибулвуқӯи президентии Ҷумҳурии Тоҷикистонро агар бо интихоботи гузашта муқоиса намоем, ба ин андеша мерасем, ки интихобкунандагони ҳозир ниёз ва интизориҳои дигар доранд. Чаро ки 7 соли пеш он хостаҳои мардум, ки аз Президенти оянда доштанд, амалӣ гашта, дар ин мудат Ҳукумати кишвар дар тамоми соҳаи хоҷагии халқ ба дастовардҳои шоёни таҳсин ноил шуда, барои мардум шароити мусоиди зистро муҳайё намуд.
Дар ин баробар амалӣ гаштани стратегияҳо, барномаҳо ва дигар санадҳои меъёрӣ-ҳуқуқӣ, ки баҳри рифат бахшидан ба шаҳрванд ва амалӣ гаштани ормонҳои миллӣ қабул ва роҳандозӣ гаштаанд, моро бовар мекунонад, ки дар ояндаи наздик боз ҳам ба шароити беҳтар ва зиндагии хубтар хоҳем расид.
Шахсан ман аз президенти оянда идомаи ин гуна созандагиву ободонӣ ва арҷ гузоштан ба арзишҳои миллиро интизор буда, аз мардум низ даъват ба амал меорам, ки ҳамеша бо эътимоду иродаи қавӣ дар паҳлӯи Ҳукумат қарор гирифта, дар таъмини амният ва пойдории сулҳу субот нақши арзишманд гузоранд.


Фотима САИДЗОДА, донишҷӯи ДМТ
Ман, албатта, ба он номзаде овоз медиҳам, ки ба занҳо таваҷҷуҳи хос дораду ба онҳо имконияти бештар медиҳад, то дар ҷомеа озодона кору фаъолият намоянд. Манфиатҳои занонро ҳимоят мекунанд ва баробарҳуқуқии онҳоро таъмин менамоянд. Инчунин барои дар хориҷа хондани онҳо боз ҳам шароит фароҳам меоваранд. Аз ин рӯ, интизории ман дар ин интихобот баланд гардидани мавқеи зан дар ҷомеа, инчунин боз ҳам зиёд гардидани занону бонувон дар корҳои идоракунии давлатӣ мебошад.