Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон 24 апрел дар маросими гусели наваскарон, ки дар Донишкадаи тарбияи ҷисмонии Тоҷикистон ба номи Саидмумин Раҳимов доир шуда, зимни он 150 нафар донишҷӯёни курси чоруми донишкада ихтиёран ба хизмати ҳарбӣ рафтанд, иштироку суханронӣ кард.

Дар ин бора шуъбаи таҳлил ва иттилооти Кумитаи кор бо ҷавонон ва варзиш иттилоъ додааст.

Ба таъкиди манбаъ, раиси Кумита зимни баромади хеш аз ихтиёран рафтани ҷавонон ба сафи Қувваҳои Мусаллаҳ истиқбол намуда, онро намунаи баланди ватандӯстӣ унвон карданд.

“Имрӯзҳо ҷавонони бонангу номуси мо хуб дарк мекунанд, ки хизмат ба Ватан нишонаи равшани эҳсоси ватандӯстӣ, дарки зарурат ва аҳамияти ҳимояи манфиатҳои давлат ва халқи кишвар мебошад. Ихтиёрӣ ба сафи Қувваҳои Мусаллаҳ рафтани ҷавонон падидаи сурурбахш буда, шаҳодати он аст, ки ҷавонони мо баҳри ҳимояи марзу буми аҷдодии хеш ва таҳкиму сулҳу осоиштагӣ ҳаматарафа омодаанд”, - таъкид кард, Абдулло Раҳмонзода.

Гуфта шуд, ки дар Донишкадаи тарбияи ҷисмонии Тоҷикистон ба номи С. Раҳимов ҷиҳати ҷалби хатмкунандагони донишкада ба хизмати ҳарбӣ корҳои фаҳмондадиҳӣ пайваста баргузор мегарданд. Натиҷаи чунин корҳо буд, ки имрӯз 150 нафар донишҷӯёни курси чорум аз чор факултети донишкада баъди бо муваффақият супоридани имтиҳони давлатӣ барои хизмат дар сафи Қувваҳои Мусаллаҳ ихтиёран сафарбар карда шуданд.

Шодӣ Сафаров, ректори ДТҶТ ба номи С. Раҳимов низ зимни баромади хеш аз иқдоми донишҷӯёни ихтиёрӣ изҳори хушнудӣ карда, ба онҳо Сипоснома тақдим намуд.

Дар охир барномаи фарҳангӣ-фароғатӣ пешкаши ҳозирин гардонида шуд.