Вазорати саноат ва технологияҳои нави Ҷумҳурии Тоҷикистон ҳаҷми истеҳсоли маҳсулоти саноатиро дар соли 2021 ба 38,8 млрд сомонӣ расонид, ки ин нишондод нисбат ба соли пешин 8,2 млрд сомонӣ зиёд мебошад.

Тавре Шералӣ Кабир, вазири саноат ва технологияҳои нави мамлакат зимни нишасти матбуотӣ иттилоъ дод, ин нишондиҳанда миёни давлатҳои ИДМ баландтарин ба ҳисоб меравад.

Қайд гардид, ки аз ҳаҷми умумии маҳсулоти саноатии соли гузашта истеҳсолшуда 50% ба саноати коркард, 28,6% ба таъминоти неруи барқ, газ, буғ ва тозакунии ҳаво, 10,3 % ба саноати истихроҷ ва 0,5% ба соҳаи таъминоти об, тозакунӣ, коркарди партовҳо ва дастраси коркарди дуюмдараҷа рост меояд. Маҳсулоти саноатии содиротшуда асосан маъданҳо, нахи пахта, чарм, пилла, консерваи меваю сабзавот, меваи хушк, нӯшокиҳои ташнашикан ва орд мебошанд.

Ҳамчунин зикр гардид, ки соли 2021 дар кишвар дар маҷмӯъ 309 корхонаву коргоҳ бо 5130 ҷойи корӣ сохта ба истифода дода шудааст, ки қисми зиёди онҳо дар соҳаи саноати сабук ва хӯрокворӣ мебошанд. Ҳаҷми сармоягузорӣ бошад, нисбат ба соли пешин 734,7 млн сомонӣ зиёд гардидааст. Аз 2386 корхонаи саноатии соли 2021 ба қайд гирифташуда, 412 корхона фаъолият накардааст.

- Соли 2021 ҳафт адад корхонаи аз фаъолият бозмонда, ба фаъолияти истеҳсолӣ оғоз намуданд ва бо истифода аз имконоти мавҷуда кӯшиш ба харҷ медиҳем, то фаъолияти истеҳсолии дигар корхонаҳои мавсимӣ ва аз фаъолият бозмонда, барқарор шавад, - гуфт дар идома Шералӣ Кабир.

- Бори аввал дар таърихи истиқлолият барномаҳои давлатӣ дар соҳаи саноат тақрибан пурра иҷро гардиданд ва тибқи нақша то соли 2025 ҳиссаи саноат дар ММД-и кишвар 26 %-ро ташкил хоҳад дод, -гуфт вазири саноат ва технологияҳои нави мамлакат.