Воридоти ашёи хоми коркард ва истеҳсоли маҳсулотҳои нав, маҳсулоти ивазкунандаи воридот ва ба содирот нигаронидашуда рӯ ба афзоиш ниҳода, соли 2017 бо ворид намудани зиёда аз 1 млн тонна гандум ва коркарди саноатии он ҳаҷми истеҳсоли орди ватанӣ ба 647,6 ҳазор тонна расонида шуд.

Шавкат Бобозода, вазири саноат ва технологияҳои нави кишвар, бо зикри ин нукта зимни нишасти хабарӣ инчунин таъкид намуд, ки “дар соҳаи масолеҳи сохтмон хаҷми истеҳсоли семент ба 3,1 миллион тонна, масолеҳи деворӣ 240,0 миллион дона, гаҷкартон 1,5 миллион дона, гаҷ 42,0 ҳазор тонна, шифер 300,0 ҳазор дона расидааст”.

Дар ҷараёни нишаст доир ба содироти маҳсулотҳои ватанӣ андешаронӣ сурат гирифта, гуфта шуд, ки дар ин давра 1 миллиону 22 ҳазор тонна семент, аз ҷумла ба Ҷумҳуриҳои Афғонистон 657,9 ҳазор тонна, Узбекистан 249,1 ҳазор тонна ва Қирғизистон 115,5 ҳазор тонна содир гардида, воридоти семент бошад, дар соли ҷорӣ 43,9 ҳазор тоннаро ташкил додааст. Истеҳсоли гаҷкартон ҳамчун маҳсулоти ивази воридот ба 1,5 миллион дона баробар шуда, аз ин миқдор 74,0 ҳазор дона гаҷкартон ба Ҷумҳурии Исломии Афғонистон содир карда шудааст.