Иттифоқи “Тоҷикматлубот” соли 2017-ро бо нишондиҳандаҳои хуб ба анҷом расонида, даромади умумӣ ба 90,9 млн. сомонӣ расонида шуд, ки ин 101 фоизи иҷрои нақшаро ташкил медиҳад.

Хуршед Сангаков, муовини раиси Иттифоқи “Тоҷикматлубот”, 7 феврал, ин нуктаро зимни нишасти хабарӣ баён намуда, иброз дошт, ки “аз ҳама намуди манбаҳо андоз ба буҷети мамлакат 28,1 млн. сомонӣ пардохт карда шудааст”.

Ҳамчунин, номбурда доир ба Соли ҷавонон суханронӣ намуда, таъкид сохт, ки аз тарафи Раёсати Иттифоқи “Тоҷикматлубот” вобаста ба Соли ҷавонон эълон гардидани соли 2017 ба донишҷӯи Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд барои иштирок намуданаш дар Универсиадаи донишҷӯён дар давлати Тайвани Чин аз рӯи намуди тенниси рӯи миз маблағи 5000 сомонӣ ва ба дастаи “Пайванди ҷавонон”-и донишкада барои иштирок дар озмуни байналмилалии “Пайванди ҷавонон”, ки дар шаҳри Лондони Англия баргузор гардид, барои сафари даста 55 440 сомонӣ пардохт карда шуд.