Соли пешин 8 нафар кормандони Хадамоти гумруки назди Ҳукумати ҷумҳурӣ бо ҷурми ришваситонӣ дастгир ва аз кор озод гардиданд. Дар ин бора муовини сардори Хадамоти гумрук Азам Турсунзода зимни нишасти матбуотӣ иттилоъ дода, афзуд, ки барои ишғоли вазифаҳои холӣ ва дарёфти мутахассисони соҳибтаҷриба дар соли 2017 хадамот 47 нафарро тариқи озмун ба кор гирифт.

- Барои нест кардани ҳолатҳои ришваситонӣ ва дарёфти мутахассисони соҳибтаҷриба дар Хадамоти гумрук бо иштироки 580 довталаб озмун гузаронида шуд, - гуфт Азам Турсунзода. - Озмун дар се марҳила аввал тестӣ, сипас кори хатӣ ва баъдан тариқи суҳбат доир гашт. Тибқи қарори комиссия, барои қабул ба хизмат дар мақомоти гумрук ба 47 нафар тавсия дода шуд. Айни замон онҳо дар вазифаҳои гуногуни Хадамоти гумрук фаъолият доранд.

Ҳамчунин, ба гуфтаи мавсуф ҳамасола Хадамоти гумрук барои тайёр намудани кадрҳои баландихтисос 15 нафарро ба Академияи гумрукии Федератсия Русия барои таҳсил мефиристад.