Имрӯз, 22 сентябр доир ба мавзӯи “Нақши публитсистика дар шароити ҷаҳонишавӣ” дар толори маҷлисгоҳи Муассисаи давлатии “Академияи ВАО-и Тоҷикистон” ҳамоиш баргузор гардид. Ин ҳамоиш бо ибтикори Вазорати маориф ва илм, Кумитаи телевизион ва радио, Муассисаи давлатии “Академияи ВАО-и Тоҷикистон” ва Иттифоқи журналистони Тоҷикистон гузаронида шуд.

Дар чорабинии мазкур устодону донишҷӯёни факлута ва бахшҳои рӯзноманигории донишгоҳҳои кишвар ва рӯзноманигорони варзида иштирок намуданд.

Сухани ифтитоҳиро Зинатуллоҳ Исмоилзода, директори МД “Академияи ВАО-и Тоҷикистон” оғоз намуда, иброз доштанд, ки публисистони тоҷик мактаби худро ба вуҷуд оварданд, ки ин мактаб дар фаъолияти мантиқии журналистикаи муосир нақши худро пайдо кардааст.

- Яке аз ин мактабҳо, ки шогирдони зиёдеро тарбияву бар камол расонидааст, мактаби публитсистии устод А. Саъдуллоев мебошад. Дар заминаи ин мактаб донишмандони зиёде ба арсаи кори журналистикаву таҳқиқи паҳлуҳои гуногуни соҳа пардохтаанд,- идома дод, З. Исмоилзода.

Ҳамзамон дар ҳамоиши мазкур Муҳаммаддовуд Саломиён, муовини якуми вазири маориф ва илми Ҷумҳурии Тоҷикистон, Рустамзода Дилафрӯз, муовини раиси Кумитаи телевизион ва радиои назди Ҳукумати Ҷумҳурии Тоҷикистон, Ҷовид Муқим, М. Муродӣ, профессорони факултети журналистикаи Донишгоҳи миллии Тоҷикистон, Қутбиддинов А., Гулов С. Дотсентони факултети мазкур доир ба фаъолияти устоди журналистикаи тоҷик Асадулло Саъдуллоев суханронӣ намуданд.

Ҳамзамон Рухшона Саъдуллоева, духтари Асадулло Саъдуллоев, дар ин чорабинӣ баромад намуда, аз дастандаркорони ҳамоиш изҳори миннатдорӣ намуд.

Дар охири ҳамоиш аъзои Иттифоқи журналистони Тоҷикистон дар қатори дигар ҷоизаву мукофотҳои соҳавӣ "Ҷоизаи ба номи Асадулло Саъдуллоев"-ро барои беҳтарин нашрияи маҳаллӣ таъсис доданд.

Мавриди зикр аст, ки соли 2019 муассисаи таҳсилоти миёнаи умумии №48-и шаҳри Ваҳдатро ба номи Асадулло Саъдуллоев номгузорӣ карда, барои хонандагон ба номи устод стипендия ташкил карданд.