Ваколатдор оид ба ҳуқуқи инсон дар Ҷумҳурии Тоҷикистон хабар медиҳад, 84 нафар кӯдаконе, ки соли 2019 аз Ироқ ба ҷумҳурӣ баргардонида шуданд, ҳанӯз ҳам ба оилаҳо ва хешу ақрабояшон баргардонида нашудаанд.

Сабаби инро Умед Бозорзода, роҳбари Ваколатдор оид ба ҳуқуқи инсон 1 август зимни нишасти хабарӣ чунин шарҳ дод:

- Вақте кӯдакон аз минтақаи ҷангзада ворид шуданд, баъзеи онҳо забони давлатиро намедонистанд. Баъзеи дигарашон дар ҳамон Ироқ таваллуд шудаанду аз модарҳояшон забони арабиро омӯхтаанд. Боз кӯдаконе ҳастанд, ки саломатии хуб надоранд. Вале Ҳукумати кишвар ба онҳо ҳамаҷониба кор бурда истодааст, чун кӯдак бояд пеш аз ҳама забони модарии худро омӯзад.

Номбурда гуфт, ки бо ташаббуси бевоситаи роҳбарияти олии мамлакат кӯдакон ҳамаҷониба нигаҳбонӣ шуда, ба оила ва хешовандонашон баргардонида мешаванд.

Зуҳро РИЗОЗОДА, “ҶТ”