Дар шаш моҳи соли равон дар дарёҳо ва кӯлҳои кишвар 83 нафар ғарқ шудаанд. Ин шумора нисбати соли гузашта 8 адад кам мебошад. Дар маҷмуъ дар ин давра 87 ҳолати ғарқшавӣ ба қайд гирифта шудааст.

Дар ин бора Раҷабалӣ Раҳмоналӣ, раиси Кумитаи ҳолатҳои фавқулода ва мудофиаи граждании назди Ҳукумати кишвар 16 июл зимни нишасти хабарӣ иттилоъ дод.

Гуфта шуд ки аз шумораи ғарқшудагон 9 нафар то синни 4 сола, 11 нафар аз 5 то 10 сола, 13 нафар аз 11 то 16 сола, 23 нафар аз 17 то 35 сола ва 27 нафар аз 35 сола боло мебошанд. Миёни онҳо мардҳо бештар буда 65 нафар ва 80% ва занҳо 18 нафар 20%- ро ташкил медиҳанд. 6 нафар ҳолати худкушӣ буда, 6 ҳолати дигар мансуби садамаҳои нақлиётӣ мебошанд. Ҳолатҳои дигар аз беназоратии волидон ва беэҳтиётии шаҳрвандон ба амал омадааст.

Раиси Кумита гуфт ҳодисаҳои ғарқшавӣ дар дарё ва кӯлҳои Тоҷикистон ҳамоно ташвишовар боқӣ монда сабаби ғарқшавӣ аксаран риоя накардани техникаи бехатарӣ ҳангоми оббозӣ мебошад.

Сайёраи ҚИЁМИДДИН, “ҶТ”