Бо мақсади пешгирӣ аз паҳншавии коронавирус дар ҳудуди кишвар аз моҳи марти соли равон корҳои поккорӣ ба роҳ монда шудаанд.

Рустам Назарзода, раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон имрӯз дар ин бора зимни нишасти хабарӣ иттилоъ дода, дар идома гуфт, гурӯҳҳои зудамале, ки махсус барои ин корҳо дар Раёсатҳои шаҳри Душанбе, ВМКБ, вилоятҳои Суғду Хатлон ва ноҳияҳои тобеи марказ созмон дода шуданд, бо истифода аз техникаи дезинфексионӣ корҳои паксозиро ба роҳ монданд. Дар шаҳри Душанбе ҳоло ҳам корҳои поккорӣ гузаронида мешаванд. Дар ин давра кормандони кумита даҳҳо тонна маҳлули гироохлорити натрий истифода карданд.

Номбурда ҳамчунин илова намуд, ки аз 1 феврал то охири моҳи июни соли 2020 зиёда аз 4000 шаҳрвандоне, ки аз кишварҳои Олмон, Ҳинд, Қазоқистон, Қирғизистон, Чин, Русия, Туркия ва ИМА ба кишвар омаданд, аз ҷониби кумита бо техникаи КҲФ ба минтақаҳои карантинӣ интиқол ва баъди адои муҳлати будубошашон дар карантин ба хонаҳояшон гусел карда шуданд.