Хонанда доштану надоштани рӯзномаҳо аз мавзӯҳое мебошад, ки ҳамеша мавриди баҳс қарор дорад. Барои муайян намудани он ки дар ҷомеа рӯзнома мехонанд ё не, мо миёни 50 нафар намояндагони қишрҳои гуногуни ҷомеа пурсиш гузаронидем. Пас аз натиҷагирии пурсиш маълум гардид, ки аз 100%-и пурсидашудагон танҳо 24%-аш доим рӯзнома мехонанд. 76%-и боқимонда бошад, умуман намехонанд.

Ин ки рӯз то рӯз шумораи хонандагони рӯзномаҳо кам шуда истодааст, хеле нигаронкунанда аст. Вале аз ҷониби дигар ҳамон шумори каме, ки пайваста рӯзномаҳоро мутолиа мекунанд, дарак аз мондагор будани рӯзномаҳост.

Рӯзнома ин - оинаи миллат ва давлат аст, ки дар он ваъзи тамоми соҳаҳои гуногун таҷассум мегардад. Ба қавли баъзеҳо хонандаи кам доштани рӯзномаҳо сабабаш интернет мебошад. Суоле ба миён меояд, ки оё ҷои рӯзномаро интернет ва ё дигар технология гирифта метавонад? Дар шароити кунунӣ тамоми мардум ба маводҳои электронӣ таваҷҷуҳ доранд ва кӯшиш менамоянд, ки ҳама чизро аз он фаҳманду ёбанд. Вале бояд гуфт, ки на ҳамаи маълумотҳои интернетӣ дуруст мебошад.

Суоле ба миён меояд, ки пас чаро аксарияти шаҳрвандон рӯзнома намехонанд? Оё рӯзнома ягон маводи хонданӣ надорад? Ҷиҳати фаҳмидани ин масъала бо мутахассисони соҳа ҳамсуҳбат гардидем.

Бахтиёр Ҳамдамов, раиси Шӯрои ВАО - и Тоҷикистон ва сармуҳаррири нашрияи “Минбари халқ” оид ба камтаваҷҷуҳӣ ба рӯзномаҳо гуфт: “Ин чиз омилҳои худро дорад. Яке аз омилҳояш ин аст, ки имрӯз бештар ба интернет таваҷҷуҳ доранд ва мехоҳанд, ки матлаби онҳо чандрасонаӣ бошад. Яъне мултимедиявӣ бошад, то ҳазм карданаш осонтар гардад. Ин яке аз сабабҳост, ки мардум ба технологияи нав рӯй овардаанд. Имрӯз дар Тоҷикистон касоне, ки синну солашон нисбатан бузургтар аст, рӯзнома мехонанд. Вақте мо савол медиҳем, ки “чаро рӯзнома намехонанд?” ин нодуруст аст. Мо бояд саволро дигар кунем, ки “чаро намехонанд?”. Умуман на китоб мехонанд, на рӯзнома. Вақте дар ҷомеа маърифат паст шуд, савод паст шуд, хонанда рӯзнома намехонад. Масъалаи дигар ин ки усули паҳнкунии рӯзномаҳоро мо бояд камтар дигар кунем, зеро нахондани он шояд аз ҳисоби нархи гарон буданаш аст. Барои хонанда доштани рӯзнома мо бояд аввал ҷомеаро босавод кунем”.

Дар ҳоле, ки Бахтиёр Ҳамдамов сабаби хонанда надоштани рӯзномаро аз паст будани маърифати ҷомеа ва пешрафти технология медонад, вале нафарони дигар ин ҳолатро баръакс шарҳ медиҳанд.

Раҷаб Мирзо, рӯзноманигори тоҷик оид ба ин масъала иброз дошт: “Шахсан инҷониб то ду сол қабл ҳар нашрия ва ҳар чиро, ки бо номи рӯзнома нашр мешуд, мехондам. Ҳоло не, сабабҳои гуногун дорад. Пеш аз ҳама ин ки аз онҳо чизи наву муҳим қариб пайдо намекунам. Дар баробари контенти шабакаҳои иҷтимоӣ бечора монданду чизи ба он баробари босифат пешниҳод карда наметавонанд”.

Наметавон ин ду андешаи ба ҳам муқобилро пурра қабул кард. Вале дар алоҳидагӣ ҳар ду ҳам як ҷанбаи қабулро дорост. Шояд маводҳои рӯзнома ба шахсе ҷолиб бошад, вале ба нафари дигар баръкаси ҳол. Мо наметавонем муқобили фикри онҳо бароем.

Баъзе нафарҳо ки мегӯянд, ҷои китобро интернет гирифтааст, шояд то андозае қобили қабул набошад. Зеро имрӯз дар давлатҳои абарқудрат, ки техникаву интернет хеле пеш рафтааст, рӯзномаҳо бо теъдоди миллионҳо чоп мешаванду хонандаи худро доранд. Ба таъкиди мутахассисон бояд рӯзномаҳо мувофиқ ба талаботи хонандаи хеш омодаву чоп гарданд, то хонандаи ҳамешагии худро дошта бошанд. Дар баробари ин аҳли ҷомеа бояд ҳамеша ба рӯзномаву ҳафтаномаҳо таваҷҷуҳ намояду пайгири он бошад.

Саҳоба ШАРИПОВА, таҷрибаомӯзи “ҶТ”