Дар шаҳри Левакант маросими ҷоизасупории Федератсияи футболи вилояти Хатлон баргузор гардид, ки дар он беҳтаринҳои мавсими соли 2025 муаррифӣ ва қадрдонӣ шуданд. Дар ин бора саҳифаи расмии федератсия дар вилоят хабар додааст.

Ба иттилои манбаъ дар чорабинӣ Абдулло Раҳмонзода, муовини раиси вилояти Хатлон, Сайвалӣ Дониёрзода, ноиби Президенти Федератсияи футболи Тоҷикистон, Субҳон Шодиев, директори генералии Лигаи футболи Тоҷикистон ва дигар меҳмонони фахрӣ иштирок намуданд.

Муовини раиси вилоят Абдулло Раҳмонзода зимни ифтитоҳи чорабинӣ аз номи раиси Федератсияи футболи вилояти Хатлон, раиси вилояти Хатлон Давлаталӣ Саид ғолибонро табрик гуфта, ба тамоми масъулин ва алоқамандони ин риштаи варзиш барору комёбӣ таманно намуд.

Дар идома ба беҳтарин намояндагони футболи вилоят аз рӯйи 20 номинатсия ҷоизаҳои инфиродӣ супорида шуд. Аз ҷумла, беҳтарин бозингар миёни кӯдакону наврасон, беҳтарин мураббии футболи наврасон, беҳтарин бозингар ва мураббии футболи бонувон, беҳтарин довар ва инчунин беҳтаринҳои Лигаи дуюм бо ҷоизаҳои махсус сарфароз гардонида шуданд.

Наврӯз Давлатов, дарвозабони дастаи “Рахш”-и ноҳияи Восеъ бори аввал дар таърихи фаъолияти худ ҷоизаи беҳтарин бозигари Лигаи дуюмро ба даст овард. Ӯ инчунин беҳтарин дарвозабони Лигаи дуюм эътироф гардид. Дар мавсими соли 2025 Наврӯз бо дастаи “Рахш” барандаи Ҷоми вилояти Хатлон ва қаҳрамони Лигаи дуюм ва ғолиби қисми ниҳоии Лигаи дуюми Тоҷикистон-2025 гардид.