Имрӯз дар маркази маъмурии вилояти Хатлон - шаҳри Бохтар чорабинии бошукуҳи идона бахшида ба Рӯзи Парчами давлатӣ баргузор гардид. Дар чорабинӣ муовинони раиси вилоят, раиси шаҳри Бохтар, роҳбарони ташкилоту идораҳо, омӯзгорону донишҷӯёни донишгоҳу коллеҷҳо ва фаъолон ширкат варзиданд.

Дар ин хусус нашрияи расмии вилояти Хатлон - рӯзномаи “Хатлон” хабар медиҳад.

Тибқи иттилоъ, қисмати аввали чорабинӣ бо роҳпаймоии шумораи зиёди иштирокдорон, ки дар даст шиору овеза ва парчам доштанд, шуруъ шуд. Иштирокчиён аз терминали мусофиркашонии шаҳри Бохтар то майдони Исмоили Сомонӣ бо шиору овезаҳо ва парчам бо руҳияи худогоҳиву худшиносӣ ва ифтихори ватандорӣ роҳпаймоӣ намуданд.

Идомаи чорабинӣ дар майдони Исмоили Сомонии шаҳри Бохтар доир гардид. Дар чорабинӣ муовини раиси вилояти Хатлон аз номи раиси вилоят Давлаталӣ Саид баромад намуда, ҳозиринро ба ин санаи таърихӣ таҳният гуфт. Мавсуф изҳор дошт, ки имрӯз сокинони шарафманди Тоҷикистони биҳиштосо бо ифтихору шукргузорӣ аз давлату давлатдории миллӣ ва дар фазои орому осудаи кишвар як санаи муҳими таърихӣ Рӯзи қабули Парчами давлатиро таҷлил менамоянд.

- Парчам дар ҳама давру замон рамзи давлати миллӣ дониста шудааст. Чунонки Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон гуфтаанд: “Парчами миллӣ – яке аз рамзҳои муҳими Истиқлоли миллӣ ва давлатдории муосири мо, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷикистон мебошад”, - изҳор дошт муовини раиси вилояти Хатлон.

Дар охири ҳамоиш чорабинии фарҳангӣ манзури ҳозирин гардонида шуд.

Ҷасури ҚИЁМИДДИН, “ҶТ”