Имрӯз дар маркази вилояти Хатлон - шаҳри Бохтар бахшида ба Рӯзи варзишгарон чорабинии идона бо иштироки собиқадорони соҳаи варзиш, кормандон, мураббиён ва варзишгарон доир гардид.

Дар чорабинӣ муовини раиси вилояти Хатлон Фирӯза Шарифӣ, сардори Раёсати кор бо ҷавонон ва варзиши вилоят Фариза Абдуллозода ва дигар масъулини вилоят иштирок намуданд.

Сараввал Фирӯза Шарифӣ ҳамаи иштирокчиёнро бо Рӯзи варзишгарон табрик намуда, зимни баромади хеш қайд намуд, ки инкишофи варзиш, тарбияи ҷисмонӣ ва дар ин замина солим гардонидани ҷомеа самти афзалиятноки сиёсати давлат ба ҳисоб меравад.

Инчунин, қайд гардид, ки барои рушд ва тарғиби намудҳои варзиши баскетбол, валейбол қаиқронӣ, ҷалби ҳарчи бештари ҷавондухтарон ба варзиш корҳои тарғиботиро бештар намуда, сафи варзишгаронро дар намудҳои зикргардида зиёд намоянд.

Дар охир собиқадорон ва мураббиёне, ки ба дастовардҳои назарраси варзишӣ ноил гардидаанд, бо туҳфа ва сипосномаҳои мақомоти иҷроияи ҳокимияти давлатии вилоят қадрдонӣ карда шуданд.