Имрӯз дар Донишгоҳи миллии Тоҷикистон мулоқоти кормандони ВАО-и кишвар бо хатмкунандагони факултети журналистика ҷиҳати ба кор ҷалб кардани онҳо баргузор гардид.

Мулоқоти мазкурро Бахтиёр Қудбиддинов, декани факултети журналистикаи ДМТ ифтитоҳ бахшида, зимни суханронӣ таъкид кард, ки “мулоқоти имрӯзаи мо анъанаи ҳамасола буда, барои аз соҳаи рӯзноманигорӣ дур нашудани донишҷӯён мо дар якҷоягӣ бо кормандони ВАО суҳбатҳои озод мегузаронем. Факултаи журналистика ягона минбаре аст, ки барои омода намудани мутахассисони нав дар соҳаи журналистика ҳамеша кӯшишҳои зиёд ба харҷ медиҳад. Ҳамасола шумораи зиёди донишҷӯён ин факултаро бомуваффақият хатм намуда, дар соҳаҳои гуногун кор ва фаъолият мекунанд. Имсол шумораи хатмкунандагони факултет 243 нафар буда, барои кору фаъолият дар соҳаи журналистика омодаанд”.

Номбурда ҳамзамон илова намуд, ки хатмкунандагони имсоларо кормандони ВАО дастгирӣ намуда, бо кор ҷалб мекунанд. Ва имрӯз донишҷӯён низ имконият доранд, ки дар алоҳидагӣ бо намояндагони ВАО суҳбат намоянд.

Дар идома байни намояндагони ВАО ва хатмкунандагони факултети журналистикаи ДМТ суҳбати озоду самимӣ сурат гирифта, хоҳишмандонро барои кор дар ВАО даъват намуданд.