То ҷашни 30-солагии Истиқлолияти давлатии Тоҷикистон барои хизматчиёни давлатӣ аз тарафи Ҳукумати кишвар манзилҳои истиқоматӣ сохта ва ба иҷора дода мешавад.

Инро Аҳмадзода Ҷамшед Ҷалол, раиси Кумитаи меъморӣ ва сохтмони назди Ҳукумати Ҷумҳурии Тоҷикистон имрӯз зимни нишасти хабарии кумита, ки дар бинои АМИТ “Ховар” баргузор шуд, изҳор дошт.

Аҳмадзода гуфт, ки ҳоло кумита нақша дорад, фақат барои кормандони кумитаи мазкур, ки ба манзили зист ниёзманданд, бинои мазилҳои истиқоматии иҷоравӣ созад ва барои 32 хонавода шароити мусоиди зист муҳайё намояд.

Дар мавриди ин ки дар нақшаи 30-солагии Истиқлолият чӣ қадар манзилҳои истиқоматӣ барои иҷора додан ба хизматчиёни давлатӣ сохта ба истифода дода мешавад, рақами аниқ гуфта нашуд, вале ба таъкиди раиси кумитаи мазкур “ин мушкилии кормандони ташкилоту муассисаҳои давлатӣ то ҷое ҳалли худро хоҳад ёфт”.

Мавриди зикр аст, ки моҳе қабл 31-уми декабри 2019 дар гурӯҳи фейсбукии “Ахбор барои афкор” аз тарафи Қурбон Аҳмадзод, як корманди нашрияи “Минбари Халқ” ба мазмуни зер пешниҳод ҳам шуда буд, ки “Ҳукумати Ҷумҳурии Тоҷикистон чанде чунин биноҳои баландошиёнаро дар пойтахти кишвар танҳо барои иҷоранишинон, бо нархи дастрас сохта ба истифода медод ва маблағи он ба буҷаи Ҳукумат ворид мешуд.”

Ин пешниҳод аз тарафи бештар аз 300 нафар писанд шуда буд ва ҳудуди 50 нафар дар шарҳи он муаллифро ҷонибдорӣ кардаанд.

Ҷамшеди Сабоҳиддин, корбари дигари Фейсбук дар шарҳи ин пешниҳод дар мавриди маблағи моҳонаи ин манзилҳо навиштааст, ки “Нарх аз 500 боло набошад”.

Мушкили дастрасӣ ба манзили зисти мусоид ва нисбатан арзон дар Душанбе барои гурӯҳи бештари кормандоне, ки аз минтақаҳо омадаанд, аз мушкилоти аввалиндараҷа ҳисобида мешавад.