Таҳти унвони мазкур 11-уми август дар доираи нақша - чорабиниҳои якҷояи Вазорати мудофиаи Ҷумҳурии Тоҷикистон бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба таҷлили ҷашни Истиқлоли давлатӣ сайёҳати сарбозони ҷузъу томҳои Қувваҳои Мусаллаҳи кишвар дар шаҳрҳои Душанбе ва Ҳисор баргузор гардид.

Чорабинии мазкур аз шаҳри Душанбе оғоз гардида, дар он зиёда аз 70 нафар сарбозону афсарон ҷалб гардиданд.

Дар қисмати аввали чорабинӣ Амир Иброҳимзода, сардори Раёсати тарбияи ватандӯстии Кумитаи кор бо ҷавонон ва варзиш суханронӣ намуда, сарбозонро ба муносибати 33-юмин солгарди Истиқлолияти давлатии Ҷумҳурии Тоҷикистон табрик намуд.
Номбурда дар идомаи суханронии худ қайд кард, ки мақсад аз баргузории чорабинии мазкур баланд бардоштани ҳисси худшиносиву худогоҳӣ, таҳкими ҳуввияти миллӣ, шиносоии хизматчиёни ҳарбӣ аз мавзеъҳои таърихиву фарҳангӣ ва ба ҷо овардани қадршиносии сарбозон дар сафи Артиши миллӣ мебошад.

Пас аз суханронӣ ва гирифтани акси хотиравӣ, иштирокчиёни чорабинӣ бо автобуси дуқабатае, ки аз ҷониби Мақомоти иҷроияи ҳокимияти давлатии шаҳри Душанбе барои сайёҳати сарбозон омода шуда буд, роҳ пеш гирифтанд, ҷониби шаҳри Ҳисор.

Дар дохили автобус сарбозоне, ки ҳунари сарояндагӣ доштанд, суруду тарона хонда, табъи дигар ҳозирини чорабиниро болида гардониданд. Сарбозонро дар шаҳри Ҳисор роҳбарияти бахши кор бо ҷавонон ва варзиши шаҳр ва ҳамчунин роҳбарияти мавзеи таърихиву сайёҳии “Қалъаи Ҳисор” самимона истиқбол гирифтанд.

Сарбозон аз “Қалъаи Ҳисор”, ки яке аз ёдгориҳои таърихии миллати тоҷик ба ҳисоб меравад, дидан намуданд. Роҳбаладони қалъа ба ҳозирин дар мавриди таърихи ин қалъа маълумот доданд.

Пас аз тамошо ва сайругашт дар дохили “Қалъаи Ҳисор” ҳозирин якҷоя акси хотиравӣ гирифта, сипас ба шаҳри Душанбе баргаштанд ва ба қисмҳои ҳарбии худ раҳсипор шуданд.