Ба ифтихори Рӯзи Ваҳдати миллӣ ва 30 – солагии Истиқлолияти Ҷумҳурии Тоҷикистон бо дастгирии Вазорати фарҳанги Ҷумҳурии Тоҷикистон 6 ҳазор гулҳои ҳархела вориди маркази ВМКБ, шаҳри Хоруғ гардид.

Дар ин бора раиси шаҳри Хоруғ иттилоъ дода гуфт, ки гулҳо аз шаҳри Душанбе дастрас шуда, аксарияташон дар шафати майдони Исмоили Сомонӣ, ҷамоату шаҳракҳо, муолиҷахонаи вилоятӣ, қад – қади роҳҳои маҳаллию байналмилалии автомобилӣ ва дигар идораву муассисаҳои шаҳрӣ шинонда мешаванд.

Бар замми ин, дар гармхонаи марказии Хоруғ, ки зиёда аз 240 м 2 масоҳат доранд, кучати гулҳои ҳархела кишт гардида, дар гармхонаҳои Раёсати ҳифзи муҳити зист, ҳоҷагии манзилию коммуналии шаҳр ва гармхонаи замонавии маҳаллаи Тирчид гулҳои намуди мино, синия, салвия, гули мирӣ, гули ҷаъфар, тоҷи хурус, портулак, сумбул, карнайчагул ва гули хандон парвариш ёфтаанд.

Бояд гуфт, ки дар корҳои кабудизоркуниву созандагии маркази вилоят, ки ҳоло ҳам ҷараён доранд, худи Вазири фарҳанги кишвар Зулфия Давлатзода ҳузур дошта, дар назар аст, ки номбурда инчунин аз ҳамаи иншооти ҷашнии Хоруғ дидан мекунад.