Дар маҷлисгоҳи Донишгоҳи давлатии ҳуқуқ, бизнес ва сиёсати Тоҷикистон 3-юми август маросими расмии оғози озмун барои дарёфти Стипендияи Президенти Ҷумҳурии Тоҷикистон барои муҳассилини муассисаҳои таҳсилоти миёнаи умумӣ, ибтидоӣ ва миёнаи касбии шаҳри Хуҷанд барои соли хониши 2022-2023 баргузор гардид.

Дар маросими расмии озмун муовини сардори Раёсати кор бо ҷавонони дастгоҳи Кумитаи кор бо ҷавонон ва варзиши назди Ҳукумати Ҷумҳурии Тоҷикистон Дилошуб Розиқзода, директори КВД "Соҳибкорони ҷавон" Шерализода Самиаллоҳ, сармутахассиси Раёсати кор бо ҷавонон ва варзиши вилояти Суғд Бахтиёр Каримов, мудири бахши кор бо ҷавонон ва варзиши шаҳри Хуҷанд Абдувосит Ғафуров иштирок ва баромад намуданд.

Зимни суханронии масъулин гуфта шуд, ки дастгирии ҷавонон ва ғамхорӣ нисбати онҳо дар меҳвари сиёсати давлату Ҳукумати кишвар ҷойгоҳи муҳимро касб карда, Ҳукумати Тоҷикистони соҳибистиқлол пайваста ба татбиқи сиёсати ҷавонон аҳамияти хосса зоҳир менамояд.

Дар озмун барои дарёфти Стипендияи Президенти Ҷумҳурии Тоҷикистон барои муҳассилини муассисаҳои таҳсилоти миёнаи умумӣ, ибтидоӣ ва миёнаи касбии шаҳри Хуҷанд барои соли хониши 2022-2023, тариқи Маркази тестӣ аз рӯи панҷ фан - география, таърих ва ҳукук, математика, забони русӣ ва англисӣ имтиҳон супорида, дониши онҳо санҷида хоҳанд шуд.