Дар вилояти Суғд беш аз 100 адад нақшаи муфассали лоиҳаҳои иншооти нав, аз қабили биноҳои баландошёнаи истиқоматӣ, маъмурӣ, таълимӣ, фарҳангӣ, сайёҳӣ, варзишӣ ва марказҳои муосири савдою хизматрасонӣ, муаррифӣ гардид.

Дар ин бора дафтари матбуоти раиси шаҳри Хуҷанд хабар додааст.

Зимни муаррифии он гуфта шуд, ки қисме аз он силсилаи биноҳои баландошёнаи замонавӣ дар кӯчаи Сирдарёи шаҳри Хуҷанд сохта мешавад, ки симои онро куллан тағйир медиҳад.

Ба иттилои манбаъ бо нақшаҳои муфассали тарҳи биноҳо раиси вилоят Раҷаббой Аҳмадзода ва раиси шаҳри Хуҷанд Фирдавс Шарифзода шинос гардида, раиси вилоят ба масъулини шаҳрсозӣ, ширкатҳои сохтмонию лоиҳакашӣ ҷиҳати мутобиқ ба стандартҳои меъморӣ ва ба инобат гирифтану сохтани он бо ороишоти санъати меъмории миллӣ супоришҳои мушаххас дод.