ҶОМЕА
Ҷумъа 12 Август 2022 08:33
8485
Аз фаъолияти таърихии омӯзгори таърих

Дар ноҳияи Данғара, хусусан ҷамоати Корез оилаи Бобоевҳоро бисёриҳо мешиносанд. Бародарон - Амир Бобо, Мирзо Бобо, Ҷӯра Бобо, Қара Бобо ва Холмаҳмад Бобо ҳар яке миёни мардуми деҳаи Рахшонзамин эҳтироми хосеро доро мебошанд. Амир ва Ҷӯра аз сабаби солҳои зиёд дар хоҷагии овозадори ба номи Ленини ноҳияи Данғара фаъолият намуданашон, миёни аҳолӣ шинохтаанд ва бисёр аз фаъолияти пурсамарашон навиштаанд. Имрӯз мо дар бораи бародари дуюмӣ Мирзо Бобо менависем. Ӯ умри пурбаракати худро сарфи таълими наврасон намудаасту 9 фарзандро бо нони ҳалоли омӯзгорӣ ба воя расонидааст...

АЗ САҲИФАИ ТАЪРИХ   

Соли 2009. Гимназияи ҷумҳурияии ноҳияи Данғара (собиқ мактаби рақами 7). Тибқи ҷадвали дарсӣ муаллим Бобоев аз фанни таърих бояд дарс гӯяд. Толибилмон баъди танаффуси 10 дақиқаина ба дарси таърих омода мешуданд. Барои ман, ки аз дигар мактаб ба Гимназияи ҷумҳуриявӣ омадаам, шиносоӣ бо дӯстони наву омӯзгорон мароқовар буд. Хурдтарин ҳаракату амали муаллимон дар назарам намоён мешуд. Кӯшиш мекардам, ки ҳар хислату рафтори муаллимонро дар кӯтоҳтарин фурсат аз худ намоям, то ягон рафтор ва ё саволи ноҷоям боиси нороҳатии эшон нагардад...

Баробари ворид шудани муаллим ба синфхона хонандагон ҳамагӣ баҳри эҳтироми устодро ба ҷо овардан, аз ҷо бархестанд. Аз дари синф марди харобинаи қоматбаланд ворид шуд. Ҳарчанд ожангҳои рӯяш аз солхӯрда шудани устод дарак медод, вале бо қомати росту овози бурро ба саломи хонандагон алек додан ва давоми 45 дақиқаи дарс қадамзанон дарс гузаштан, осор аз пиронсолии ӯ намемонд. Дар назари аввал муаллим Мирзо барои ман ҳамчун як нафари боғурур, баландгир намуд. Ӯ ҳангоми машғулият дастҳояшро ба пушт мегирифт, ба болои синфхона дида духта, ҳарф мезад. Ҳангоми дарс ҳисси миллии хонандагонро бедор мекард. Аз ғосибон ба қаҳр мегуфту аз ҷонфидоиҳои қаҳрамонони халки тоҷик бо ифтихор. Вале ҳангоми посух ба пурсиши талабагон дарҳол аз нақшофарӣ баромада, ба назди нафари савол дода рафта, бо лаҳни ба худаш хос суҳбат мекард.

ШИРИНГУФТОР

Миёни деҳаи Данғараи боло, ки Гимназияи ҷумҳу-риявии ноҳия он ҷо ҷойгир мебошад ва деҳаи Рахшонзамин ҳудуди 3 километр роҳ аст. Мирзо Бобоев, Маҳмадкарим Шарипов (омӯзгори фанни забон ва адабиёт) ва Амиралӣ Ташрипов (муаллими фанни билология ва химия) ҳарсе пиёда субҳгоҳон ба таълимгоҳ омада, баъди анҷоми соатҳои дарсӣ якҷо бармегаштанд.

Баъди анҷоми дарс ва суҳбат дар саҳни таълимгоҳ бо муаллим Мирзо андешаи маро ҷиҳати шинохти эшон куллан тағйир дод. Муносибати ӯ нисбати шогирдон ба ман ҷуръат дод, ки баъди анҷоми дарсҳо бо онҳо қадамзанон ба хона равам. Қатори ман дигар хонандагон ҳам буданд, ки се муаллимро иҳота карда, суҳбаткунон мерафтанд. Мо аз онҳо дар баробари таълим берун аз дарс дарси одамиятро меомӯхем. Ҳар як рафтору сухани онҳо барои мо ҷаҳоне маънӣ дошт.

Муомилаи хубу лаҳни гуфтори муаллим Мирзо Бобоев барои натанҳо толибилмон, балки сокинони деҳа намуна аст. Ӯ бо забони шевою форами адабии тоҷикӣ ва тоҷикона суҳбат мекард. Ҳар як нафарро бо хислаташ миёни ҷомеа мешиносанду эҳтиром мекунанд. Муаллим Мирзо бо ҳамин хислаташ миёни шогирдони пешин ва имрӯза шинохта мешавад.
Ба нафаре тақлид мекунанд, ки ҳунараш воқеан аз дигарон фарқкунанда ва намуна аст. Миёни мо ҳамсабақон анъанае, буд, ки дар ғайби муаллимон то қадри тавоноӣ худро дар нақши онҳо месанҷидем ва бо даст додани фурсат дар ягон чорабинии фарҳангии гимназия худро омӯзгор карда, нақшофарӣ мекардем.

Ҳатто шогирдон ҳангоми тақлидкорӣ Бобоевро тақлид карданӣ мешуданд, ҳатман бо забони адабӣ ва бисёр самимӣ сухан гуфтанро оғоз мекарданд. Ӯ миёни хонандагони даврони мо намунаи шахси тарбияёфта ва дорои фарҳанги баланду пири барнодил буд.

ХУДШИНОС

Худшиносӣ маҳаки асосии дарсҳои муаллим Мирзо буд. Ӯ донандаи хуби таърихи миллати тоҷик аст ва барои худшиносии насли наврас хизмати шоёнеро анҷом додааст. Давоми фаъолияти омӯзгории худ Мирзо Бобоев шогирдони зиёдеро ба камол расонд. Имрӯзҳо аксар шогирдони тарбиянамудааш дар вазифаҳои гуногун кор ва фаъолият доранд. Баъди ҷамъбасти фаъолияти омӯзгорӣ масъулияти ҷиддитареро ба зимма дошт. Дар осорхонаи даврони мактабии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фаъолият кард. Азбаски донандаи хуби таърих буд, ба нафароне, ки баҳри тамошои осорхонаи мазкур меомаданд, бо ифтихор аз паҳлуҳои таърихии осорхона ва корнамоиҳои Пешвои муаззами миллат қисса мекард.

Аз хатми Гимназияи ҷумҳуриявии ноҳияи Данғара 10 сол сипарӣ гашт. Дар ин муддат борҳо бо муаллим Мирзо суҳбат доштем. Ӯ аз муваффақияти ҳар як шогирдаш кӯдаквор меболад. Дар суҳбате аз хасташавии асабҳояш шикоят карду ба қадри имкониятҳои фароҳамгашта расидану даврони ҷавониро самаранок истифода бурданро таъкидамон кард.
Имрӯзҳо, ки устод даврони пирӣ меронад, ба ӯ соломатии бардавому осоиши рӯзгорро орзумандем.

ШАРҲИ ҲОЛ

Мирзо Бобоев соли 1944 дар деҳаи Рахшонзамини ноҳияи Данғара ба дунё омадааст. Донишгоҳи омӯзгории Тоҷикистонро хатм намудааст. Баъди хатми донишгоҳ дар Мактаб–интернати ноҳияи Данғара фаъолияти омӯзгорияшро оғоз намуда, дар мактаби №48 ва Гимназияи ҷумҳуриявии ноҳияи Данғара ба ҳайси муаллими фанни таърих кору фаъолият кардааст. Аълочии маорифи Ҷумҳурии Тоҷикистон, нафақахур, соҳиби 9 фарзанд.

PS: Имрӯзҳо зиёд мушоҳида мешавад, ки шогирдон дар сомонаҳои иҷтимоӣ ҷониби устод - муаллим санг мепартоянд. Ман мегӯям, ки муаллимоне, ки ба ман дарс гуфтаанд, ба маънои томашон инсон буданд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Август 2022 c.