7-уми ноябр дар доираи нақшаи чорабиниҳои Раёсати кор бо ҷавонон ва варзиши вилояти Суғд дар толори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ конференсияи вилоятӣ таҳти унвони “Савганди Пешвои миллат - савганди мо ҷавонон” доир гардид.

Конфронс бо садо додани Суруди миллии Ҷумҳурии Тоҷикистон оғоз гардид. Кори конфронсро сардори Раёсати кор бо ҷавонон ва варзиши вилоят Каримзода Мирзоқосим оғоз намуда, қайд кард, ки бо ибтикор ва дастгирии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи таҷлили 30-солагии Истиқлолияти давлатии Ҷумҳурии Тоҷикистон дар самти дастгирии ҷавонон тадбирҳои судманд андешида шуда, чандин иншоотҳои бузурги варзишӣ, фароғатӣ, муассисаҳои таълимӣ ба истифода дода шуданд, ки ҷавонон дорои имкони хуби таҳсил ва фароғат гаштанд.

“Пешвои миллат бо дилу нияти нек тамоми идораҳои давлатро дар замони бениҳоят ҳассос, ки хавфи пароканда шудани давлат ва аз байн рафтани миллати тоҷик баръало эҳсос мегардид, бар уҳда гирифтанд ва дар як муддати кӯтоҳ шуълаи умедро ба фардои дурахшон дар қалби ҳар як фарди миллат фурӯзон намуданд. Президенти маҳбуби кишвар, муҳтарам Эмомалӣ Раҳмон принсипҳои бунёди сиёсати давлатии ҷавононро бо набзи замон ва руҳи ҷавонон мувофиқ сохта, дар доираи сиёсати созанда ваҳдати миллиро миёни ҷавонон густариш бахшиданд, меҳнати ҳалол ва интизоми қатъиро бунёд гузоштанд, робитаҳои судбахшро бо кишварҳои мутамаддин дар самти ҳамкориҳои ҷавонон боло бурданд ва шаклҳои нави фаъолияти ҷавононро роҳандозӣ намуданд”, - гуфт дар идома Каримзода Мирзоқосим.

Сипас, олимони ҷавон, ҷавонони фаъоли вилоят, гирандагони Стипендияи президентӣ ва раиси вилоят баромад ва ибрози андеша намуданд.

Конференсия бо қабул намудани муроҷиатнома ва якдилона ҳамовозии намудан зери шиорҳои "Савганди Пешвои миллат-савганди мо ҷавонон!", "Мо ҷавонон ба Пешвои миллат содиқем!" ва "Ҷавонон пайрави Пешвои миллат!" ҷамъбаст гардид.