Дар Донишгоҳи славянии Русияву Тоҷикистон 4-уми октябр бо ибтикори мақомоти иҷроияи ҳокимияти давлатии шаҳри Душанбе ва Раёсати кор бо ҷавонон ва варзиши пойтахт конференсияи илмӣ – адабӣ таҳти унвони “Забони миллат – ҳастии миллат” баргузор гардид.

Конференсияи мазкур бахшида ба Рӯзи забони давлатӣ ва истиқболи 30 – солагии Иҷлосияи 16 – уми Шӯрои Олии Ҷумҳурии Тоҷикистон гузаронида шуда, дар он Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Гавҳар Шарофзода, вакили Маҷлиси намояндагони Маҷлиси олии Ҷумҳурии Тоҷикистон, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, Асрори Сомонӣ, узви Иттифоқи нависандагони Тоҷикистон, Дилрабо Ашурова, муовини раиси Кумитаи иҷроияи ҲХДТ дар шаҳри Душанбе ва дигарон иштироку суханронӣ намуданд.

Шоҳзод Раҳимзода, сардори Раёсати кор бо ҷавонон ва варзиши шаҳри Душанбе пас аз садо додани Суруди миллӣ конференсияи илмӣ – адабиро ҳусни оғоз бахшида, нахуст кулли иштирокчиёнро ба Рӯзи забони давлатӣ табрик намуд.

Ӯ гуфт: “Дар воқеъ, забони модарӣ лафзи бузург, ширин ва муқаддасест, ки барои ҳар як инсони комил баробари пайдо шудани ҷон дар бадан, забони модарӣ пайдо мешавад. Забони тоҷиқӣ яке аз забонҳои қадимаи дунё ба ҳисоб рафта, таърихи бузург дорад. Имрӯз ин забони муқаддасро чун забони бузурги башарӣ ҳамагон мешиносанд, ба он арҷ мегузоранд ва хоҳиши омӯхтани ин онро доранд. Давоми солҳои соҳибистиқлолии кишвар Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди забони тоҷикӣ диққати аввалиндараҷа зоҳир намуда, дар раванди ислоҳоти забони давлатӣ пеш аз ҳама забони ҳуҷҷатгузорӣ, нашриёту муассисаҳо, номгузории маҳаллаву кӯчаҳо, хиёбонҳо дар мадди аввали сиёсати Ҳукумати Ҷумҳурии Тоҷикистон қарор гирифта, қонуни Ҷумҳурии Тоҷикистон дар бораи забони давлатӣ қабул гардид. Инчунин 5-уми октябр Рӯзи забони давлатӣ эълон гардид”.

Дар хотимаи конференсия аз ҷониби Раёсати кор бо ҷавонон ва варзиши шаҳри Душанбе ба намояндагон ва маърузачиён сипоснома тақдим карда шуд.

Таҳмина ЮСУФӢ, “ҶТ”