Бо ибтикори мақомоти иҷроияи ҳокимияти давлатии шаҳри Кӯлоб дар ҳамбастагӣ бо олимону унвонҷӯён ва донишҷӯёни Донишгоҳи давлатии Кӯлоб ба номи Абӯабдуллоҳ Рудакӣ конфронси илмӣ- амалӣ таҳти унвони “Барномаи амал об барои ҳаёт–барномаи умумиҷаҳонӣ ва умумимиллӣ” доир карда шуд.

Исмоилзода Сайидмурод, муовини раиси шаҳри Кӯлоб, зимни ифтитоҳи конфронс оид ба ташаббусҳои созандаи Пешвои миллат суханронӣ намуда, иброз доштанд, ки эъломияи мазкур на танҳо ба нафъи Тоҷикистон, балки барои тамоми мардуми сайёра муҳимияти хос дошта, барои таъмин бо оби ошомидании тоза дар даҳ соли минбаъда мусоидат хоҳад намуд.

Дар ҷараёни чорабинӣ иштирокчиён инчунин вобаста ба масъалаи оби тоза, тарзи дуруст нигоҳ доштан ва самаранок истифода бурдани он, пок нигоҳ доштани он ва арҷ гузоштан ба ин неъмати бебаҳои табиат андешарониҳо намуда, дар охир миёни иштирокчиён ва масъулин суолу ҷавоб сурат гирифт.