Дар Донишгоҳи давлатии Хоруғ (ДДХ) ба номи Моёншо Назаршоев бо иштироки устодону донишҷӯёни Донишгоҳ ва Пажуҳишгоҳи илмҳои гуманитарӣ ба номи академик Баҳодур Искандарови Академияи илмҳои Ҷумҳурии Тоҷикистон бахшида ба Рӯзи забони давлатӣ конфронси илмӣ–амалӣ баргузор гардид.

Конфронсро Таҳмина Саодатқадамова, ноиби ректори ДДХ оид ба илм ифтитоҳ намуда, ҳозиринро ба муносибати ҷашни бузурги забони модарӣ табрику шодбош гуфт.

Мудири кафедраи забони тоҷикии Донишгоҳи Хоруғ, профессор Муқбилшо Аламшоев дар маърӯзаи хеш оид ба “Забони тоҷикӣ – бунёди халқи тоҷик” қайд намуд, ки забони модарӣ яке аз рукнҳои асосии давлатдорӣ, ғоя ва ҳастии давлату миллат мебошад: “Забони бузурги тоҷикӣ решаи амиқи таърихӣ дошта, ҳанӯз аз замони давлатдории салтанати “Тоҳириён”, “Сафориён” ва “Сомониён” ҳамчун забони расмию коргузорӣ ба кор бурда шудааст. Бинобар ин, имрӯз ҳам бояд аз тамоми роҳу усулҳо истифода кард, то ки он покизаву беолоиш нигоҳ дошта шавад”.

Дар чорабинии илмӣ ҳамчунин профессор Назрӣ Офаридаев, Лаълҷубаи Мирзоҳасан, дотсенти кафедраи адабиёт ва санъати ДДХ, Сӯҳроб Мирзошоев, мудири кафедраи забонҳои шарқ, Муслима Броимшоева, муаллимаи калони кафедраи забони тоҷикӣ дар мавзӯҳои “Рушди забони тоҷикӣ дар даврони Истиқлолият”, “Забон – рукни ҳастии миллат”, “Андешаҳои бузургон оид ба нерӯи забон”, “Забони тоҷикӣ – забони миллати тоҷик” маърӯза карданд.

Сипас, донишҷуёни Донишгоҳ дар васфи забони модарӣ шеърҳо қироат намуданд.