ҶОМЕА
Сешанбе 21 Май 2024 01:58
10179
Нигарониҳо аз созмонҳои экстремистиву террористӣ

Ҳарчанд дар кишвар бо қарорҳои Суди Олӣ фаъолияти 28 ташкилоти экстремистиву террористӣ манъ шудааст, вале ҳолатҳои шомил шудан ба чунин ҳизбу ҳаракатҳо ҳанӯз ба назар мерасад.

Эмомалӣ Раҳмон

Тули 10 соли охир дар Ҷумҳурии Тоҷикистон 6680 ҷинояти дорои хусусияти экстремистиву террористӣ, аз ҷумла 86 амали террористӣ ва сӯиқасд ба он ошкор гардидааст, ки 11 ҳолати амали террористӣ ва сӯиқасд ба он пешгирӣ гардидааст.

Ин нуктаро Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯзи 9-уми март зимни вохӯрӣ бо ходимони дин иброз намуданд.

Аз ҷумла, Сарвари давлат зикр карданд, ки давоми се соли охир 24 нафар шаҳрвандони мо дар 10 кишвари дунё ба амалҳои террористӣ, аз ҷумла дар анбӯҳи одамон таркондани худ, даст задаанд.

- Дар ин давра бар асари ташвиқоти гус-турдаи экстремистӣ тавассути шабакаҳои иҷтимоӣ ва ҳангоми дар муҳоҷирати меҳнатӣ қарор доштани шаҳрвандон шомилшавии ҷавонон ба ташкилоти экстремистиву террористии “Давлати исломӣ” ва дигар гурӯҳҳои террористӣ, сафарбар гардидани онҳо ба минтақаҳои даргир афзуда, нигарониҳои ҷиддии ҷомеаро ба миён овард, -илова намуданд Президенти кишвар.

ОМИЛҲОИ ДОХИЛАВУ БЕРУНА?

Ҷавонон бояд дарк намоянд, ки гаравидан ба гурӯҳҳои тундрав, даст задан ба амалҳои террористӣ ва бадном кардани давлату миллат оқибатҳои ногувор дорад.

Эмомалӣ Раҳмон

Таассуфовар он аст, бештари онҳое, ки ба чунин кирдорҳои нангин даст мезананд, қишри ҷавони ҷомеа маҳсуб меёбанд.

Бо вуҷуди роҳандозии барномаҳо ва муборизаи доимӣ бар зидди терроризму экстремизм аз ҷониби Ҳукумати кишвар ҳоло ҳам чунин ҳолатҳо ба назар мерасанд.

Президенти кишвар низ зимни суханрониашон бо ходимони дини кишвар иброз доштанд, ки тули солҳои ахир зуҳуроти тафриқаандозиву ифротгароии динӣ афзоиш меёбад. Аз ҷумла афзуданд:

“Бояд гуфт, ки бо вуҷуди муносибати неки давлат нисбат ба ҳамаи дину мазҳабҳо, бахусус, нисбат ба дини мубини ислом, солҳои охир зуҳуроти нороҳатсозандаву нигаронкунандаи таассубу хурофот, тафриқаандозиву ифротгароии динӣ ва дар ин замина риоя нагардидани меъёрҳои Конститутсия ва қонунҳои амалкунанда афзоиш ёфта истодааст”.

Коршиносон мегӯянд, ба чунин кирдорҳо даст задани ҷавонон ҳам омилҳои беруна ва ҳам дохила дорад, ки заминаи мусоидро барои онҳо фароҳам меоварад.

Фаррух Салимов коршиноси тоҷик яке аз чунин кирдорҳоро аз як тараф, таъсири бекорӣ ва надоштани дурнамои иҷтимоӣ медонад, ки он бахусус ба ҷавонон, заминаи мусоидеро барои радикализатсия ба миён меорад.

Ба андешаи номбурда, дар Ҷумҳурии Тоҷикистон таҳдиди экстремизм хатари дугона дорад. Якум вуруди эҳтимолии ҷангҷӯён аз он сӯи сарҳад ва дуюм ин тундгароӣ дар дохили кишвар, бахусус байни ҷавонону муҳоҷирон мебошад.

ИНТЕРНЕТ - ЯКЕ АЗ РОҲҲОИ ИСТИФОДАИ МОҲИРОНАИ ГУРӮҲҲОИ МАМНУЪ

Дар ин давра бар асари ташвиқоти густурдаи экстремистӣ тавассути шабакаҳои иҷтимоӣ ва ҳангоми дар муҳоҷирати меҳнатӣ қарор доштани шаҳрвандон шомилшавии ҷавонон ба ташкилоти экстремистиву террористии “Давлати исломӣ” ва дигар гурӯҳҳои террористӣ, сафарбар гардидани онҳо ба минтақаҳои даргир афзуда, нигарониҳои ҷиддии ҷомеаро ба миён овард.

Эмомалӣ Раҳмон

Омили дигари ба чунин гурӯҳҳо шомил шудани ҷавононро коршиносон дар истифодаи моҳиронаи шабакаҳои иҷтимоӣ аз ҷониби тундгароён арзёбӣ мекунанд.

Зубайдулло Давлатов, сардори Раёсати таъминоти иттилоотии Маркази тадқиқоти стратегии назди Президенти Ҷумҳурии Тоҷикистон низ бар он аст, ки ҳоло дар саҳифаҳои сомонаю шабакаҳои иҷтимоии интернетӣ ифротиёни зиёде ҳузур пайдо намудаанд.
Номбурда мегӯяд, имрӯз телевизион, радио, рӯзнома, маҷалла, сомона, портал, шабакаҳои иҷтимоӣ ва интернет ба фазо ва минбари муборизаҳои иттилоотӣ табдил ёфтаанд. Муҳорибаҳои иттилоотӣ бо истифода аз роҳу усулҳои мухталифи техникӣ ва электронӣ ба роҳ монда мешаванд.

- Назорати вазъи мубориза, ҳифзи иттилоъ, ҷанги киберӣ, ҷанги электронӣ, терроризми иттилоотӣ, муҳосираи иттилоотӣ, ҷанги психологӣ, ҷосусии саноатӣ ва иқтисодӣ номгӯи нопурраи воситаҳои муборизаи иттилоотӣ ба шумор меравад, - баён дошт ӯ.
Аз ин рӯ, ин коршиноси тоҷик чунин мешуморад, ки бояд аз ҳоло даст ба кор шуд ва бар зидди ин гуна иғвоангезиҳои беасосу бемаврид дар шабакаи ҷаҳонии интернет мубориза бурд.

- Дар фазои интернетии Тоҷикистон барнома, гуфтору наворҳои хашину тахрибию ифротӣ кам нестанд, балки рӯ ба зиёдшавӣ доранд. Қишрҳои осебпазири ҷомеа чун ба саҳифаҳои интернетӣ ворид мешаванд, маводро мутолиа менамоянду ноогоҳона ба иғво дода мешаванд, - илова намуд ӯ дар охир.

ИМКОНИЯТҲОЕ, КИ БОЯД ИСТИФОДА БУРД

Мо ба ин шаҳрвандон бори дигар муроҷиат мекунем, ки фирефтаи ҳар гуна дасисаҳо нагардида, фикри падару модар, фарзандон, обрӯи давлат ва миллатро кунанд. Онҳо метавонанд дилпурона ба Ватан баргарданд ва аз имкониятҳои дар қонун пешбинигардида истифода намоянд.

Эмомалӣ Раҳмон

Айни замон дар Ҷумҳурии Тоҷикистон 4075 нафар шаҳрвандон барои содир намудани амалҳои экстремистиву террористӣ дар кофтуков қарор доранд.

Ҳукумати кишвар барои шаҳрвандонаш иқдомеро рӯи даст гирифт, ки тибқи он нафарони ба ҳизбу ҳаракатҳои гуногун шомилшуда афв мешаванд. Коршиносон мегӯянд, ки ин яке аз иқдомҳои наҷиб барои баргаштани шаҳрвандон ба кишвар маҳсуб меёбад, ки на ҳар кишвар чунин қонунҳоро дорад.

Вобаста ба ин ташаббус ба қонунгузории ҷиноятии кишвар тағйиру иловаҳо ворид карда шуда, муқаррар гардид, ки дар сурати ихтиёран даст кашидани шаҳрвандон аз иштирок дар фаъолияти гурӯҳҳои экстремистиву террористӣ, инчунин, қатъ кардани иштироки минбаъда дар задухӯрдҳои мусаллаҳона дар ҳудуди дигар кишварҳо онҳо аз ҷавобгарии ҷиноятӣ озод карда мешаванд.

Ба гуфтаи Сарвари давлат бо истифода аз ин имконият дар даҳ соли охир 1640 нафар ба Ватан баргаштанд ва парвандаҳои ҷиноятӣ нисбат ба онҳо қатъ карда шуданд.

Танҳо соли 2023-юм 328 ва дар ду моҳи аввали соли ҷорӣ 140 нафар шаҳрвандон аз ин имконият истифода кардаанд.
- Вобаста ба ин, Прокуратураи генералӣ ва дигар мақомоти ҳифзи ҳуқуқ вазифадор карда мешаванд, ки корро дар самти ба ватан баргардонидани онҳо, инчунин, бо ҷойи корӣ таъмин намудани чунин шахсон ва шаҳрвандони аз муассисаҳои ислоҳӣ озодшуда ба таври қатъӣ ҷоннок намоянд, - дас-тур доданд Пешвои миллат.

Инчунин, дар натиҷаи амалисозии тадбирҳои мушаххас аз ҷониби Ҳукумати кишвар дар се соли охир тақрибан 400 нафар шаҳрвандони кишвар ва соли 2023-юм 104 нафар, яъне 29 оила, ки аз занон, нав-расон ва тифлони хурдсол иборат буданд, аз Сурия ва Ироқ ба ватан баргардонида шуданд.

ТАШАББУСҲО

Дар вазъияти мураккаби ҷаҳони муосир мо вазифадорем, ки ба хотири ҳифзи истиқлолу озодӣ ва амнияти давлату ҷомеа дар баробари риояи талаботи қонунҳои давлати дунявӣ ба арзишҳои динӣ оқилона муносибат намуда, ҳам арзишҳои созандаи дини исломро ҳифз намоем ва ҳам пеши роҳи паҳншавии тафриқаандозиву ифротгароиро гирем.

Эмомалӣ Раҳмон

Барои раҳоӣ аз ин зуҳуроти номатлуб дар баробари иқдомоти пешгирифтаи Ҳукумати кишвар, коршиносон роҳҳои дигареро низ пешниҳод менамоянд.

Зубайдулло Давлатов, сардори Раёсати таъминоти иттилоотии Маркази тадқиқоти стратегии кишвар мегӯяд, вақти он расидааст, ки аҳли қалам, зиёиён, намояндагони қишрҳои гуногуни ҷомеаи шаҳрвандӣ, собиқадорони кордидаву таҷрибаи ҳаётандӯхта дар сомонаҳои интернетӣ маводу навору таҳлилу андешаҳои арзишманди ватанпарваронаи худро ҷой диҳанд, яъне дар фазои маҷозӣ “контенти мусбат” офаранд.

- Фазои маҷозии Ҷумҳурии Тоҷикистонро ба фазои тарғиби сулҳу салоҳ, суботу ваҳдат, дӯстии халқҳою миллатҳо бояд табдил дод. Дар шабакаҳои иҷтимоӣ таҳлилҳо, мақолаҳо, мавқеъгириҳо, вокунишҳо, маводи ташвиқотию арзишсоз, савтию тасвирии ватандӯстонаро бояд ба таври васеъ ҷой дод, -мегӯяд мавсуф.

Аз ҷумла, Фаррух Салимов коршиноси тоҷик мегӯяд, дар посух ба ин кишвари мо тадбирҳои муқовиматро, аз ҷумла таҳкими амният ва роҳандозии барномаҳои беҳбуди зиндагии мардум, тарҳҳои омӯзишӣ ва таҳкими ҳамбастагии иҷтимоӣ таҳия менамояд.

Вале ба гуфтаи ӯ, барои баланд бардоштани сатҳи огоҳии ҷонибҳои манфиатдор, аз ҷумла мансабдорони давлатӣ, муаллимон ва пешвоёни дин, тавассути тренингҳо ва семинарҳо фаҳмиши аломатҳои радикализатсия ва усулҳои пешгирии онро беҳтар мекунад. Ӯ мегӯяд, ин равиш ба таъсиси шабакаи коршиносон ва мутахассисон барои муборизаи таъсирбахш бо экстремизм мусоидат мекунад.
- Рушди ҳамкории байнисоҳавӣ ва байнимазҳабӣ имкон медиҳад, ки байни муассисаҳо ва ҷомеаҳои гуногун ҳамкорӣ карда, платформаҳо барои муколама ва ҳамкорӣ эҷод гарданд. Ин амр имкон медиҳад, ки захираҳо барои рафъи ҳам сабабҳои бевосита ва ҳам аслии экстремизм муттаҳид карда шаванд.

Бояд гуфт, имрӯз дар Ҷумҳурии Тоҷикистон барои мубориза бо ин гуна амалҳои номатлуб қонунҳо “Дар бораи озодии виҷдон ва иттиҳодияҳои динӣ”, “Дар бораи муқовимат ба экстремизм”, “Дар бораи муқовимат ба терроризм”, “Дар бораи танзими анъана ва ҷашну маросим”, “Дар бораи масъулияти падару модар дар таълиму тарбияи фарзанд”, Консепсияи сиёсати давлатӣ дар соҳаи дин, стратегияҳои миллӣ оид ба муқовимат ба экстремизм ва терроризм барои солҳои 2016 - 2020 ва 2021 - 2025 қабул ва мавриди амал қарор дода шудаанд.

Фарзонаи УМАРАЛӢ, "ҶТ"

Эзоҳи худро нависед



Рамзҳо дар расм