Саридораи геологияи назди Ҳукумати Ҷумҳурии Тоҷикистон соли 2023 корҳои омӯзиши геологиро аз ҳисоби маблағҳои буҷети давлатӣ аз рӯи 29 лоиҳа ба маблағи 17 217 375, 0 сомонӣ дар объектҳои металлҳои сиёҳ, ранга, қиматбаҳо, нодир, сангҳои худҷило ва ороишӣ, гидрогеология, геологияи муҳандисӣ ва геоэкология ба роҳ мондааст, ки нисбат ба ҳамин давраи соли 2022 – 1 076 375,0 сомонӣ зиёд мебошад.

Илҳомҷон Оймуҳаммадзода, сардори Саридора дар ин бора 30-юми январ зимни нишасти хабарӣ ба рӯзноманигорон иттилоъ дод.

Ӯ зикр кард, ки дар давраи сипаригардида корҳои шартномавӣ аз рӯи 191 лоиҳа ба маблағи 19 059 896,0 сомонӣ ва корҳои пудратӣ ба маблағи 632 451,0 сомонӣ ба иҷро расонида шуда, дар маҷмӯъ, ҳаҷми корҳои иҷрошуда бо усули хоҷагидорӣ 35 644 820,0 сомониро ташкил медиҳад.

- Саридораи геология дар соли 2023 бо 120 ширкат шартномаи истифодабарии захираҳои табиӣ, ки дар он бонуси обунавӣ ба маблағи умумии 79 673 208,0 сомонӣ ва бонуси кашфи тиҷоратӣ ба маблағи умумии 467 305,0 сомонӣ, дар маҷмӯъ, ба маблағи 80 140 513 сомониро ташкил медиҳад, ба имзо расонид, - илова кард, сардори Саридора.

Амони МУҲАММАД, “ҶТ”