– Очаҷон , дуоям деҳ, то аз ҷанг бо сари баланд баргардам, - хоҳиш намуд аз модар Тиллои ҷавон.

– Худованд нигаҳбонат бошад, - ашк дар чашмон даст ба фотиҳа бардошт модар,- сиҳат рафта саломат баргардӣ.

Ҳамин тавр, соли 1942 Тилло Зоиров қатори дигар намояндагони Тоҷикистон ба майдони набардҳо равон гардид. Аввал ӯро дар ҳайати наваскарон чанд муддат ба машқ фаро гирифтанд. Аз яроқ тир паррондан, истифодаи усулҳои гуногун ҳангоми ҷанги даст ба гиребон ва ғайраро аз худ намуд. Фармондеҳон пайваста ба наваскарон таъкид мекарданд, ки дар рафти машқҳо бодиққат бошанд. Ҳар як ҷузъи омӯзиши машқҳоро хуб аз бар намуда, аз душман ҳарос накунанд. Зеро дар майдони ҷабҳа малакаҳои аз худ карда, ҳатман ба кор хоҳад омад. Инро ба инобат гирифта, Тиллои ҷавон саъй дошт, ҳар фармудаи фармондеҳонро бе каму кост аз бар намояд.

Ҳамин тавр, ба тоҷикписар Тилло Зоиров лозим омад дар ҳайати баталони 3-юми бригадаи 21-уми тирандози гвардиягӣ зиди душмани ғаддор ба ҷанг дарояд. Дар рафти муҳорибаҳо ӯ батадриҷ маҳорат ва малакаи ҷангӣ пайдо намуда, аз худ корнамоиҳо нишон медод.

Соли 1944, ҳангоми убури дарёи Днестр, дар вилояти Стансилавский (ҳоло Иваново-Франковск), қисмати ғарбии Украина матонати тоҷикписар Тилло Зоиров ҳувайдо гардид. Он замон вай ҳамчун сержанти гвардия роҳбарии отделенияи сарбозони пиёдагардро ба уҳда дошт.

Дар соҳили рӯди калон якбора гурӯҳи сарбозони немис ба сари ҷанговарони шӯравӣ, ки сержант Тилло Зоиров ба эшон роҳбарӣ мекард, ҳамла оварданд. Тоҷикписар аз ҳамлаи ногаҳонии душман наҳаросид. Баръакс ба тобеонаш фармон дод, ба мудофиа пардохта, ҳуҷуми душманро бартараф созанд. Лозим омад бо душман ҷанги даст ба гиребон намоянд. Муҳориба чандон тӯл накашид, лек сарбозони шуравӣ тавонистанд ҳамлаи душманро бартараф созанд. Тилло Зоиров аз ҳама бештар кӯшиш намуда, якчанд сарбози душманро нобуд ва чанд нафари дигарро шахсан асир гирифта тавонист. Барои нотарсӣ ва матонат сержанти гвардия Тилло Зоиров бо медали “Барои шуҷоат” сарфароз гардонда шуд.

Қатори дигар ҷанговарон Тилло Зоиров душманро дар лонааш мағлуб намуда, бо сари баланд ба диёр баргашт. Дар баробари медали “Барои шуҷоат” сари синаи ӯро ҳамчунин ордени “Ҷанги Бузурги Ватанӣ” ва дигар мукофотҳои ҷангӣ зинат медод.

Сиҳату саломат ба манзил баргаштани худро ба дуои неки модар пайваст медонист.

– Маҳз дуои додаи модар боис шуд, ки ба ватан баргардам, - борҳо ба наздикону пайвандон ва дӯстон иброз намуда буд вай.

Пас аз анҷоми ҷанг дубора ба зодгоҳаш ноҳияи Орҷоникидзеобод (ҳоло шаҳри Ваҳдат) баргашта, аввал дар хоҷагӣ, пасон дар автоколоннаи 2927-и ноҳия чун ронанда заҳмат кашид. Дар рафти фаъолияти меҳнатӣ борҳо ғолиби мусобиқаи сотсиалистӣ дониста шудааст. Борҳо ӯро ба мактабҳо, корхонаю муассисаҳо даъват намуда, аз рӯзгори ибратомӯзаш қиссаҳои ибратбахш шунидаанд.

Сол то сол сафи иштирокчиёни он ҷабҳаҳои хунини Ҷанги Бузурги Ватанӣ кам мегардад, лек матонату диловарӣ ва корномаҳои он нафарон, аз ҷумла Тилло Зоиров, ки баҳри ҳимояи Ватан содир намудаанд, аз лавҳи хотири наслҳои баъдӣ фаромӯш нахоҳад шуд.

Саодат ҲОҶИБОЕВА,
омӯзгори коллеҷи
тиббии шаҳри Ваҳдат