Кумитаи ҳифзи муҳити зисти назди Ҳукумати Ҷумҳурии Тоҷикистон баҳри нобуд кардани фурӯзонакҳои симобдор таҷҳизотҳои муосирро ба кишвар ворид намудааст.

Дар ин бора 25 июл зимни нишасти хабарии Кумитаи мазкур иттилоъ дода шуд.

Бино ба гуфти масъулини Кумита яке аз ҳадафҳои асосӣ ин коҳиш додани таъсири манфии партовҳои зарарнок ба муҳити зист мебошад. Бо ин мақсад аз ҷониби Кумита 3 адад таҷҳизоти коркард ва безараргардонии фурӯзонакҳои симобдор харидорӣ ва дар шаҳрҳои Душанбе, Турсунзода ва Исфара ба истифода дода шудааст, ки то ба имрӯз ба миқдори 474 099 адад фурӯзонакҳои симобдор безарар гардонида шудаанд.

Иқдоми мазкур аз ҷониби ин Кумита баҳри нобуд кардани фурӯзонакҳои симобдор дар ҳолест, ки чанд сол пеш Ҳукумати кишвар истифодаи фурӯзонакҳои сӯзонро барои аҳолӣ мамнӯъ эълон намуда, истифода фурӯзонакҳои симобдор ва ё ба истилоҳ каммасрафро тавсия дода буд.

Яҳё МАҲМАДНАБИЕВ, “ҶТ”