Бар асари офатҳои табиӣ дар шаш моҳи аввали соли равон 30 нафар шаҳрвандони кишвар ҷони худро аз даст додаанд.

Дар ин бора 4 август Рустам Назарзода, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон зимни нишасти матбуотии ниҳодаш иттилоъ дод.

Ӯ иброз дошт, ки дар шаш моҳи аввали соли равон дар кишвар 475 ҳодисаи фавқулодаи хусусияти табиидошта, ба қайд гирифта шудааст, ки дар соли гузашта ин ҳолат 607 адад буд. Аз шумораи умумӣ 36 ҳодиса ба хоҷагии халқ зарари моддӣ расонд.

Номбурда қайд намуд, ки аз ин ҳодисаҳои фавқулодаи табиӣ 470 хонаи истиқоматӣ (28 хона пурра, 73 қисман, 369 иншооти ёрирасон), 4 мактаби таҳсилоии умумӣ ва муассисаҳои томактабӣ, 6 пул, 2916,1 гектар замини кишт ва 404 км роҳи мошингард зарар дидааст.

Раиси Кумита гуфт, ки ба хонаводаҳои зарардида кумакҳо дар шакли маводҳои сохтмонӣ, маводи ғизоӣ, бастаҳои беҳдоштӣ ва хоҷагӣ ҷудо карда шуда, ба ноҳияҳо бурдаву миёни ниёзмандон тақсим карда шуданд.