- Дар нимсолаи аввали соли 2021 Кумитаи забон ва истилоҳоти назди Ҳукумати Ҷумҳурии Тоҷикистон дар заминаи санҷиш ва омӯзиши иҷрои Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” фаъолияти 23 субъектҳои хоҷагидорро мавриди санҷиш қарор дод, - гуфт Муҳаммадҷонзода Олимҷон, раиси кумитаи мазкур зимни нишасти матбуотӣ. - Чунин санҷишҳо дар як қатор вазорату идораҳои давлатии кишвар низ ба роҳ монда шуда, санадҳои дахлдор вобаста ба ислоҳи камбудиҳо қабул гардиданд.

Қайд гардид, ки дар ин давра кумита ба 51 санади меъёрии ҳуқуқӣ хулосаи экспертизаи забоншиносӣ ва танзими ҳамгунсозии истилоҳот пешниҳод намуд. Ҳамчунин аз ҷониби мутахассисони кумита 61500 истилоҳ (3 луғатнома, 17 барномаи таълимӣ ва 4 маводи таҳлилию дастурамал) мавриди баррасӣ ва мувофиқа қарор гирифтааст.

Дар давраи ҳисоботӣ тибқи қарори Ҳукумати Ҷумҳурии Тоҷикистон дар бораи “Феҳристи номҳои миллии тоҷикӣ” ба 518 муроҷиати шаҳрвандон оид ба номгузории фарзанд хулоса пешниҳод шудааст, ки назар ба ҳамин давраи соли гузашта 48 муроҷиат зиёд мебошад. Аз инҳо 19 муроҷиат аз ҷониби аққалиятҳои миллӣ буда, ба 262 муроҷиаткунанда хулосаи рад, ба 337 муроҷиаткунанда хулосаи тавсиявӣ дода шудааст.

Ҳамчунин тибқи талаботи санадҳои меъёрии амалкунанда ба 23 номгузории муассиса ва 67 объектҳои ҷуғрофии шаҳру ноҳияҳо хулоса пешниҳод гардида, 873 номи ғайримеъёрии ҷуғрофӣ иваз карда шуд.

Гуфта шуд, ки вобаста ба иҷрои “Барномаи рушди забони давлатӣ барои солҳои 2020-2030” лоиҳаи “Қоидаҳои имлои забони тоҷикӣ” ва “Аломатҳои китобати забони тоҷикӣ” таҳия ва бо қарори Ҳукумати Ҷумҳурии Тоҷикистон” 30-юми июни соли 2021 №268 тасдиқ гардид.