Имрӯз дар Кумитаи миллии олимпӣ курси омӯзишии “Мактаби сайёри ҷавондухтарони роҳбар” бахшида ба моҳвораи ҷавонон баргузор гардид.

Дар курси мазкур Ирина Каримова, ноиби президенти Академияи таҳсилоти Тоҷикистон, Зарнигор Раҷабзода, муовини раиси ташкилоти ҷамъиятии “Пайравони Пешвои миллат” ва як қатор ҷавондухтарони фаъол ширкат варзиданд.

Сараввал Ирина Каримова дар мавзӯи “Нақши бонувон дар рушди соҳаи маориф” маърӯза намуда, аз ҷумла гуфт: “Омӯзгорон бояд як хислати хуб дошта бошанд. Хислати хуби омӯзгор ин муҳаббат нисбати шогирди худ мебошад. Муҳаббат доштан ба кӯдакону наврасон ва бо онҳо дуруст рафтор намуданро омӯзгорон бояд тавонанд”.

Сипас суолу ҷавоб сурат гирифта, ҷавондухтарон ба суолҳои пешниҳоднамудаашон посухҳои мушаххас гирифтанд.

Дар охир, сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба Ирина Каримова, ноиби президенти Академияи таҳсилоти Тоҷикистон супорида шуд.

Таҳмина ЮСУФӢ, “ҶТ”