ҶОМЕА
Душанбе 20 Май 2019 07:32
5883
ё пайдо шудани раҳбари дииш дар шимоли афғонистон баёнгари чист?

Баробари ба миён омадани имкони сулҳ бо Толибон дар Афғонистон хабарҳои нав ба наве пайдо шудаанд, ки нишон медиҳанд барои идомаи умри терроризми байналмилалӣ дар ин кишвар лоиҳаи тозае тавлид ёфтааст. Манзур пайдо шудани аксу наворҳои наве аз Абӯбакри Бағдодӣ, раҳбари гурӯҳи террористии ДИИШ дар расонаҳои ҷаҳонист, ки далолат ба ҳузури ӯ дар Афғонистон мекунад. Воқеан дар аксе, ки расонаҳои Афғонистону Ироқ нашр кардаанд, Бағдодӣ дар либоси сиёҳ ва нимтанаи беостин дида мешавад, ки маъмулан дар Афғонистон мепӯшанд. Инчунин дар акс ӯ рӯи курпача нишаста ба пушташ болишт дорад. Бешак, савол ба миён меояд, ки пайдо шудани хабарҳо дар хусуси ҳузур доштани ӯ дар Афғонистон, хусусан дар шимоли ин кишвар ба кадом маъност? Ин ҳам дар ҳоле, ки ҳамин шабу рӯз талош барои овардани сулҳу субот ба Афғонистон аз чанд ҷониб идома дорад. Ва низ дар ҳоле, ки фиристодаи вижаи ИМА дар умури Афғонистон Залмай Халилзод гуфтааст: “Сулҳ бо Толибон ба маънои поёни ҷанг дар Афғонистон нест”. 

Дар бораи ҳузури Абӯбакри Бағдодӣ дар Афғонистон чанде пеш Боқир Зубайдӣ, вазири собиқи истихбороти Ироқ дар як барномаи телевизионӣ изҳор доштааст. Ӯ гуфтааст, ки навори охири Абӯбакри Бағдодӣ дар Сурия сабт шуда буд. Аммо ҳавопаймоҳои қудратҳои бузург ӯро ҳамроҳи ҷамъе аз сарони хориҷии ДИИШ ба минтақаи амн интиқол додаанд, то нақшаи муайяншуда барои Бағдодӣ ба манзури барҳам задани амнияти кишварҳои минтақа ва бархе кишварҳои бузургро такмил кунанд. Аммо рӯи курпача ва пушт бар болишт нишастани Бағдодиро дар акс далел оварда, таҳлилгарони афғон муътақиданд, ки навор дар Афғонистон сабт шудааст ва эҳтимол раҳбари гурӯҳи террористӣ низ пештар ба кишвари онҳо интиқол ёфтааст.

Аз ҷониби дигар муқовиматҳои низомии Русия чанд соли охир ба муқобили ДИИШ дар Сурияву Ироқ баёнгари он аст, ки ин гурӯҳи террористӣ дар кишварҳои номбурда дигар оянда надорад. Аз ин лиҳоз, ҳомиёни ин гурӯҳи террористӣ барои ҳифзу бақои ҳаёти он ниёзманданд, то раҳбарони ДИИШ-ро ба минтақаҳое ба монанди Афғонистон интиқол диҳанд...

Ҳанӯз соли 2014 матлаберо дар шумораи №39-и рӯзномаи “Ҷавонони Тоҷикистон” бо номи “Толибон дигар омили хатар нестанд?” навишта, гуфта будем, ки ҳаракати Толибон барои ҳомиён ба як гурӯҳи дуюмдараҷа табдил ёфтаву ҷои онро гурӯҳи террористии ДИИШ ишғол кардааст... Ҳоло бо гузашти панҷ сол маълум мегардад, он чи ки имрӯз дар Афғонистон ҷараён дорад, идомаи ҳамон бозӣ аст.

Кишварҳои пуштибон ба ҷои Толибон дар Афғонистон ДИИШ-ро дидан мехоҳанд. Дар он матлаб бо такя ба қавли таҳлилгарони байналмилалӣ зикр шуда буд, ки Абӯбакри Бағдодӣ тарбиятёфтаи лагерҳои хориҷӣ, аз ҷумла амрикоиву яҳудиҳост...

Барои беҳтар шинохтани вазъияти феълии Афғонистон ё худ рӯшантар дида тавонистани манзара беҳтар аст, баъзе маълумотҳоеро ёдовар шавем, ки ходими кӣ будани Бағдодиро маълум менамояд. 

Моҳи июли соли 2014 Эдуард Сноуден, корманди собиқи Маркази истихборотии Амрико, ифшогари барномаҳои назоратии интернетӣ, бо фош кардани як силсила ҳуҷҷатҳо дар бораи ҳаракати ДИИШ иттилоъ дода буд. Аз он ҷумла хабаргузории “Infowars” навишт, ки тибқи ҳуҷҷатҳои ифшокардаи Сноуден Хадамоти истихборотии Британия (MI-6), ИМА (CIA) ва Исроил (MOSSAD) якҷо ҳаракати ДИИШ-ро ба майдон оварданд. Ҳуҷҷатҳо, маълум намуда буданд, ки Хадамоти истихборотии се давлат бар асоси стратегияи “Хонаи занбӯр” гурӯҳи террористии ДИИШ-ро барои он сохтанд, ки ҳаракатҳои экстремистии ҷаҳонро дар Сурия ҷамъ оваранд. Ва тибқи ин стратегия аз тамоми ҷаҳон ба Сурия ҷангиёну “муҷоҳидон” интиқол ёфтанд. 

Таҳияи стратегияи “Хонаи занбӯр” барои ба вуҷуд овардани андешаи бардурӯғ, ки гӯё ба Исроил душманони беруна таҳдид доранд, зарур буд... Аммо собиқ сарвазири Исроил Моше Шаретта дар дафтари ёддоштҳояш навиштааст, ки Исроил ҳеҷ гоҳ таҳдиди арабиро ба амнияташ ҷиддӣ намегирифт. “Ёддоштҳои Шаретта нишон медиҳад, ки роҳбарияти сиёсӣ ва ҳарбии Исроил ҳеҷ гоҳ ба мавҷудияти ягон навъи таҳдиди арабӣ ба амнияташ бовар надоштааст. Балки сионистҳо бо макру ҳилла кишварҳои арабиро ба низоъ тела дода, онҳоро ваъдаи пирӯзии сареъ медиҳанд. Бо ин роҳ Исроил тавонистааст, кишварҳои арабиро ба бесуботӣ кашида, ҳудуди забтшударо васеъ кунад”, - навишта буд журналисти амрикоӣ Ралф Шонман дар асараш “Таърихи махфии сионизм” (The Hidden History of Zionism).

Моҳи июли ҳамон сол (2014) Набил Наим, яке аз қумондонҳои собиқи “Ал-қоида” ба шабакаи телевизионии “Ал-Майдин”-и Бейрут иттилоъ дода гуфта буд, ки тамоми воҳидҳои амалкунандаи “Ал-қоида” бо шумули гурӯҳи террористии ДИИШ барои ташкилоти марказии истихбороти Амрико кор мекунанд. Пештар аз баёнияи Набил Наим маълумот дар мавриди иртиботи пешвои гурӯҳи террористии ДИИШ Абӯбакри Бағдодӣ бо Хадамоти истихборотии кишварҳои хориҷӣ нашр шуда буд. Чунончи, Агентии хабарии Баҳрайн “Gulf Daily News” навишта буд, Абӯбакри Бағдодӣ “ба ҷуз аз курсҳои диншиносӣ ва санъати суханварӣ давоми як сол таҳти роҳбарии Маркази истихборотии давлати Исроил таълими низомӣ гирифтааст”.

Инчунин моҳи июн соли 2014 яке аз мақомдорони Урдун изҳор дошт, ки соли 2012 аъзои гурӯҳи террористии ДИИШ дар як пойгоҳи махфии Урдун таҳти роҳбарии тренерҳои амрикоӣ машқи ҳарбӣ гузаштаанд. Ҷеймс Скайлер Ҷерронд, собиқ афсари ташкилоти марказии истихбороти ИМА, ки солҳои 2006-2007 аз роҳбарони конслагери ҳарбии амрикоӣ дар Ироқ Кэмп-Букка буд, иброз дошт, ки конслагери мазкур макони тайёр кардани экстремистон будааст. Ба қавли афсари собиқ аксарияти роҳбарони террористҳоро, ки дар ҷангҳои кишварҳои арабӣ фаъол буданд, конслагери амрикоии Кэмп-Букка, воқеъ дар Ироқ тайёр кардааст.

Ҳамон сол коршиноси рус Вячеслав Матузов дар суҳбат ба радиои “Голос России” гуфта буд: “Ҳама далелҳо исбот мекунанд, ки Абӯбакри Бағдодӣ гумоштаи “СРУ”-ст. Ӯ солҳои 2004-2009, ки дар Ироқ дар зиндони амрикоиҳо буд, бо Хадамоти иктишофии ИМА ҳамкорӣ мекард...” 

Агар ба ин гуфтаҳо дар хусуси раҳбари гурӯҳи террористӣ, балки ҳомиёни ӯ таваҷҷуҳ кунем, пас маълум мегардад, ки ӯ дар Афғонистон худ аз худ пайдо нашудааст. Дар ин сурат қавли вазири собиқи истихбороти Ироқ, ки дар боло овардем, воқеӣ менамояд.

Ниҳояти сухан ин ки гурӯҳи террористии ДИИШ дар Ховари Миёна аз иттиҳоди кӯбандаи Русия, Эрон, Сурия, Ироқ ва нерӯҳои мардумии минтақа шикаст хурд. Зеро ба муқобили ин иттиҳод ИМА ва муттаҳидонаш дар Сурия ва Ироқ аз қудрати кофӣ бархӯрдор набуданд.

Аммо Афғонистон барои ДИИШ майдони амну ороме маҳсуб мешавад. Зеро қудратҳои зидди ДИИШ монанди Русия ва Эрон наметавонанд дар кишваре алайҳи ДИИШ вориди ҷанг шаванд, ки на дар ихтиёри онҳо, балки таҳти султаи мустақиму ҳамаҷонибаи НАТО аст. Илова бар ин, Русия таҷрибаи талхи ҷанг дар Афғонистонро дорад. Вале ин ҳама маънои онро надорад, ки Русия дар муқобили хатари ДИИШ ба марзи кишварҳои Осиёи Миёна ором менишинад. Умедворкунанда ҳам он аст, ки Сергей Шойгу вазири дифои ин кишвар ҳам баён доштааст: Русия омодагии ҷангии пойгоҳҳои ҳарбиашро дар Қирғизистон ва Тоҷикистон тақвият бахшида, барои пешгирии наздикшаваии ҷангиён аз Афғонистон ба марзҳои кишварҳои шарикаш чораҳои зарурӣ меандешад.
  
Аз гуфтаҳои Сергей Шойгу хулоса чунин аст, ки Русия манфиатдор аст, тамоми чораҳоро андешад, то ин ки ҷангиёни ДИИШ ба кишварҳои Осиёи Марказӣ сар нахалонанд... 


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Май 2019 c.