Дирӯз дар Муассисаи давлатии “Маркази рушди истеъдодҳои назди Сарраёсати маорифи шаҳри Душанбе” бахшида ба 110 - солагии Шоири халқӣ ва Қаҳрамони Тоҷикистон устод Мирзо Турсунзода маҳфили адабӣ таҳти унвони “Мунодии сулҳ ва шоири тавоно баргузор гардид.

Дар маҳфили адабӣ Низомӣ Муҳриддин, ректори Донишкадаи давлатии фарҳанг ва санъати Тоҷикистон ба номи Мирзо Турсунзода, Мубашшири Акбарзод, адабиётшинос, корманди Академияи миллии илмҳо, омӯзгорон ва ғолибони олимпиадаҳои фаннӣ иштирок доштанд.

Иштирокчиёни чорабинӣ сараввал аз намоиши дастранҷи хонандагони Муассиса ва ғолибони озмунҳои “Иншои беҳтарин” дар мавзӯи “Мирзо Турсунзода-вассофи сулҳу дӯстӣ” ва “Беҳтарин расм” дар мавзӯи “Турсунзода-Қаҳрамони Тоҷикистон” дидан намуданд.

Баъдан доир ба ҳаёт ва фаъолияти Мирзо Турсунзода ва сафарҳову баромадҳояш аз минбарҳои баланди сатҳи байналмилалӣ навори видеоӣ таҳти унвони “Ошёни баланд” намоиш дода шуд.

Дар идома оид ба ҳаёт ва фаъолияти адабӣ ва ҷамъиятиву сиёсӣ, нақши устод Мирзо Турсунзода дар рушди адабиёт ва фарҳанги миллӣ аз ҷониби меҳмонон ва хонандагони Муассиса маърӯзаҳо ироа карда шуд. Инчунин аз ҷониби хонандагони иттиҳодияи таълимии “Забон ва адабиёти тоҷик” андар ситоиш ва поси хотири шоири ширинкалом гулчини адабӣ ва шеъру тарона пешкаши иштирокчиён гардид.

Дар фарҷоми чорабинӣ ғолибони озмунҳои “Иншои беҳтарин” дар мавзӯи “Мирзо Турсунзода-вассофи сулҳу дӯстӣ”, “Беҳтарин расм” дар мавзӯи “Турсунзода-Қаҳрамони Тоҷикистон” ва “Турсунзодахонӣ” бо ифтихорнома ва туҳфаҳои хотиравӣ қадрдонӣ карда шуданд.