Имрӯз дар толори Кумитаи миллии олимпии Тоҷикистон маҳфили омӯзишии “Ҷавонон пайрави Пешвои миллат” ҷамъбаст гардид.

Дар он Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва ҷавонон иштирок намуданд.

Абдулло Раҳмонзода, раиси КҶВ зимни баромади хеш вобаста ба маҳфили мазкур ибрози назар намуда, таъкид карданд:

“Аз 23 феврали соли ҷорӣ маҳфили омӯзишии “Ҷавонон пайрави Пешвои миллат” баргузор гардида истодааст. Дар маҳфил 50 нафар ҷавонони фаъоли муассисаҳои таҳсилоти олӣ ва миёна, ки дастовардҳои назарраси илмию варзишӣ доранд, ҷамъ оварда шуданд. Мақсади асосии маҳфил васеъ кардани ҷаҳонбинии маънавию сиёсии ҷавонон буда, он 3 моҳ давом кард.

Иштироки ҷавонон дар чорабиниҳои сиёсию фарҳангӣ аз он далолат мекунад, ки ҷавонони мо бо ҳисси баланди худшиносиву худогоҳии миллӣ ва ифтихор аз давлату давлатдории миллӣ дар оянда низ тамоми неруи худро барои ҳифзи дастовардҳои истиқлолият, таҳкими давлатдорӣ, ваҳдати миллӣ, сулҳу субот, рушди минбаъдаи иқтисодиву иҷтимоии Ватани азизамон ва устувор гардонидани мавқеи он дар қатори кишварҳои мутараққӣ сафарбар менамоянд”.

Дар охир аз ҷониби раиси Кумита ба 45 нафар аъзоёни маҳфил шаҳодатномаи хатми маҳфили мазкур дар фазои тантанавӣ тақдим карда шуд.