Дар натиҷаи гузаронидани санҷишҳои амалиётӣ зиёда аз 2700 ҳолати бе қайди мақомоти андоз ба фаъолияти соҳибкории ғайриқонунӣ машғул гардидани шахсони воқеӣ, 2120 ҳолати бе шартномаи меҳнатӣ ба кор ҷалб намудани коргарони кироя, 480 ҳолати бе қайди мақомоти андоз ба иҷро додани объектҳои молу мулки ғайриманқул ошкор карда шуданд.

Дар ин бора зимни нишасти матбуотӣ Нусратуллоҳ Давлатзода, раиси Кумитаи андози назди Ҳукумати кишвар иттилоъ дод.

Ба таъкиди номбурда дар нимсолаи аввали соли 2018 нақшаи тасдиқшудаи андозҳо ва дигар пардохтҳои ҳатмӣ, ки ҷамъовари онҳо ба зиммаи мақомоти андоз гузошта шудааст, ба андозаи 101,2% таъмин гардида, ба буҷет 5 млрд. 50,5 млн. сомонӣ ворид карда шуд, ки ин нисбат ба нишондиҳандаҳои пешбинишуда, 58,0 млн. сомонӣ зиёд мебошад.