25-уми апрел дар Донишгоҳи миллии Тоҷикистон маҳфили “Сиёсатшиносони ҷавон” дар мавзӯи “Мактаби давлатдории Пешвои миллат дарси бузургест барои ҷавонон” бо иштироки васеи донишҷӯён ва аъзоёни маҳфил баргузор гардид.

Дар маҳфили мазкур Маликшо Неъматзода, раиси Федератсияи иттифоқҳои касабаи мустақили Тоҷикистон, Зарнигор Раҷабзода, муовини раиси ташкилоти ҷамъиятии “Пайравони Пешвои миллат” ва Тӯҳфа Муқимзода, роҳбари маҳфили мазкур иштирок ва суханронӣ намуданд.

Иштирокчиёни маҳфил нахуст аз “Осорхонаи Пешвои миллат ва маркази илмӣ–таҳқиқотӣ”-и донишгоҳ дидан намуданд.

Маҳфил бо садо додани Суруди миллӣ ба таври зинда оғоз гардида, сипас Зарнигор Раҷабзода бо сухани ифтитоҳӣ баромад кард.

Маликшо Неъматзода зимни баромади хеш аз замонҳои ҷанги шаҳрвандӣ ёдовар шуда, нақши Пешвои миллатро дар барқарории сулҳ ва ба даст овардани Истиқлолият назаррас маънидод кард.

-Мо дар тӯли беш аз 30 соли фаъолияти худ роҳи 100-соларо тай намудем. Маҳз соҳибистиқлолии кишвар аст, ки мо имрӯз озодона дар ватани биҳиштосо умр ба сар мебарем. Барои даст ёфтан ба ин неъмати бебаҳо нақши Пешвои миллат ва заҳматҳои ин марди бузург бисёр назаррас мебошад, - гуфт Маликшо Неъматзода.

Дар ҷараёни маҳфил миёни меҳмонон ва донишҷӯён суолу ҷавоб сурат гирифта, дар ҷамъбаст меҳмони маҳфил – Маликшо Неъматзода ва якчанд нафар иштирокчии фаъол бо Сипосномаи Кумитаи кор бо ҷавонон ва варзиш сарфароз гардонида шуданд.

Ҳамзамон дар ин баробар Маликшо Неъматзода ба Зарнигор Раҷабзода сипоснома ва ба Тӯҳфа Муқимзода дипломи Федератсияи иттифоқҳои касабаи мустақили Тоҷикистонро тақдим кард.

Ҳ. РАҲМАТУЛЛОЕВ, “ҶТ”