Соҳибкасб ва бо ҷои кор таъмин намудани ҷавонон аз ибтидои соҳибистиқлолӣ дар маркази диққати Ҳукумати кишвар буда, дар робита ба ин тадбирҳои гуногуне то имрӯз амалӣ карда шудаанд.

Яке аз иқдомҳое, ки дар ин самт роҳандозӣ гардидааст, ташкили КВД “Биржаи меҳнатии ҷавонон” мебошад. КВД “Биржаи меҳнатии ҷавонон” соли 1997 дар қатори дигар ташкилотҳои системаи кор бо ҷавонон бо қарори Ҳукумати кишвар ташкил гардидааст. Корхона 22 сол аст, ки фаъолият дошта, мақсад аз таъсиси он мусоидат намудан ба шуғлнокии ҷавонон, роҳнамоӣ намудан барои интихоби касб, ташкил намудани курсҳои омӯзишӣ ва ба роҳ мондани корҳои гуногун ҷиҳати рушди неруи зеҳнӣ ва сармояи инсонии ҷавонон мебошад.

Умед Раҳимзода, директори КВД “Биржаи меҳнатии ҷавонон” мегӯяд, корхона дар ҳамкорӣ бо Вазорати меҳнат, муҳоҷират ва шуғли аҳолии Ҷумҳурии Тоҷикистон тибқи нақша дар аввал ва охири моҳ дар ярмаркаҳои ҷойҳои кории холие, ки баргузор менамоянд, ширкат меварзад. Ӯ гуфт: “Имсол дар моҳвораи ҷавонон  бо дастгирии раиси Кумитаи кор бо ҷавонон ва варзиш, ки фаъолияти моро дар ҳама самтҳо дастгирӣ мекунанд, ярмаркаи соҳавии Вазорати меҳнат, муҳоҷират ва шуғли аҳолӣ ва “Биржаи меҳнатии ҷавонон” на танҳо дар ҳудуди шаҳри Душанбе, балки дар тамоми ҷумҳурӣ баргузор шуд, ки дар он ҳам ҷойҳои кории холии худамонро ва ҷойҳои кории холии дигар ташкилоту муассисаҳоро дар ҳошияи Форуми рушди сармояи инсонӣ пешкаши сокинон намудем. Дар ин форум кордиҳандаи хориҷии мо, ки дар шаҳри Новосибирски Русия аст, ширкати яхмосбарорист иштирок намуда, 200 ҷойи кории холияшонро муаррифӣ карданд”. 

Тайи чанд соли охир аст, ки дар корхона курсҳои кутоҳмуддати ройгон ба роҳ монда шуда, тавассути он ҷавонон соҳиби касбу ҳунар мегарданд. 

“Аввалин курс дар назди корхона “Ҳунар беҳ аз симу зар аст” ном дошт, ки он дар асоси Барномаи миллии рушди иҷтимоии ҷавонон барои солҳои 2016-2018 роҳандозӣ гардида буд, - афзуд Умед Раҳимзода . – Дар ибтидо курсҳои кутоҳмуддати “Адрасбофию атласбофӣ” ва “Қаннодӣ” буд. Дар ин курсҳо ҷавондухтарон аз тамоми минтақаҳои кишвар иштирок намуда, соҳиби шаҳодатномаи марказ гардидаанд, ки метавонанд, дар асоси он дар ҷойи зисти худ аз рӯи ҳунари омӯхтаашон фаъолияти худро  ба роҳ монанд. Дар соли 2017 ду курси нави дигар бо номи “Ороишгари рӯю мӯй” ва вобаста ба тайёр намудани ҷавондухтарон ба ҳаёти мустақилона курси нави рӯзгордорӣ “Кадбонугӣ” ташкил гардида, дар доираи он дарси равоншиносӣ низ ба таълимгирандагон дода мешавад. Инчунин дар мо курси таъмиргари телефони мобилӣ фаъолият мекунад. Дар соли 2017 зиёда аз 260 нафар ва соли 2018 беш аз 180 нафар ҷавонон курсҳои моро хатм намуданд. Соли 2019 бошад, курсҳои “Қаннодӣ”, “Кадбонугӣ” ва “Ороишгари рӯю мӯй”-и моро 65 нафар ҷавон омӯхта истодаанд”.

Биржаи меҳнатии ҷавонон тибқи шартнома бо ширкати “Новосибхолод”-и кишвари Русия то имрӯз 40 нафар ҷавонро аз кишвар ба ин корхона равон карда, то охири сол ин рақам ба 65 нафар расида, онҳо бо ҷойи кори хуб ва маош таъмин мегарданд.

“Фаъолияти КВД “Биржаи меҳнатии ҷавонон”, ки дар назди Кумитаи кор бо ҷавонон ва варзиш аст, ин албатта сиёсати дурандешонаи Ҳукумати кишвар, хоса Президенти кишвар муҳтарам Эмомалӣ Раҳмон мебошад. Кам мушоҳида мешавад, ки баҳри ҷавонон дар дигар кишварҳо чунин имкониятҳо фароҳам оварда шавад. Роҳандозӣ намудани чунин курсҳои ройгон ба манфиати тамоми ҷавонони кишвар аст. Барои ҷавони имрӯза шароит муҳайё буда, танҳо онҳо бояд хоҳиши хондан дошта бошанду бо аз бар намудани илму дониш саҳми худро дар рушди кишвар гузоранд”, - иброз дошт Умед Раҳимзода, директори КВД “Биржаи меҳнатии ҷавонон”.

Манижа Раҳимова, сокини шаҳри Душанбе буда, хонашин мебошад. Ӯ гарчанде то андозае аз ҳунарҳои пазандагӣ огаҳӣ дошт, вале боз мехост, то ҳунари пазандагӣ ва тарзи омода сохтани шириниҳои навтарин ва кулчақандҳоро беҳтар омӯзад. Бо огаҳ гардидан аз курси қаннодӣ дар маркази таълимие, ки КВД “Биржаи меҳнатии ҷавонон” ташкил намудааст, бисёр хушҳол шуда, дарҳол барои бароварда гардонидани орзуҳояш роҳ сӯйи онро пеш гирифт ва имрӯз яке аз омӯзандагони фаъоли курси мазкур аст. 

Ба таъкиди ин ҷавондухтар “агар ҳунар дошта бошед, ҳеҷ гоҳ ба душворӣ рӯ ба рӯ намегардед. Ин ҷо бисёр чизҳоро омӯхтам. Аз пӯхтани кулчақандҳо то омода намудани хӯришҳои гуногун. Ба дигар духтарон тавсия медиҳам, ки омода ин ҷо ҳунар омӯзанду соҳибкасб гарданд. Ин имконияте, ки баҳри мо ҷавонон муҳайё гардидааст, бояд самаранок истифода намоем”. 

Яке аз таълимгирандагони дигари маркази таълимӣ Мадина Қаҳҳорова, донишҷӯи курси аввали Донишгоҳи Славянии Русияву Тоҷикистон чунин гуфт:

“Дарс хеле хуб буда, ба мо мутахассиси соҳа нозукиҳои ҳунари кадбонугиро меомӯзонад. Ҳар ҷавондухтар бояд дорои ҳунарҳои зиёд бошад”.

Шабнам Розиқова дар маркази таълимии КВД “Биржаи меҳнатии ҷавонон” ба ҳайси муаллимаи ҳунари қаннодӣ ва кадбонугӣ фаъолият намуда, то имрӯз чандин гурӯҳҳои ҷавондухтаронро соҳибҳунар намудааст. Аз ӯ чун доир ба таваҷҷуҳи ҷавондухтарон ба ҳунаромӯзӣ пурсон гардидем, гуфт: “Духтароне, ки дар ин ҷо касб омӯхта истодаанд, бисёр шавқу завқи зиёд доранд. Ҳар гуфтаи моро доир ба ҳунарҳои кадбонугӣ ва қаннодӣ дарҳол аз худ мекунанду доир ба чи гуна дар муддати муайян омӯхтани ҳунарҳои мазкур суолҳо медиҳанд ва пас аз посухҳояшро шунидан, пайи иҷрои он мегарданд. Муддате, ки ҷавондухтарон дар ин ҷо таълим мегиранд, тамоми нозукиҳои ҳунари кадбонугӣ ва қаннодиро аз бар менамоянд”.

Масъулини КВД “Биржаи меҳнатии ҷавонон” бо вуҷуди пешравиҳои корхона аз фаъолияти худ қаноатманд набуда, дар оянда нақша доранд, ки фаъолияти хешро боз ҳам фарохтар намоянд, филиалҳои худро дар тамоми минтақаҳои кишвар фаъол созанд ва ҳамкориро бо кордиҳандаҳои хориҷӣ хубтар кунанду барои ҷавонон дар дохил ва хориҷи кишвар имкониятҳои хуби шуғлнокро фароҳам оваранд.