- Давоми соли 2019 хонандагони болаёқати шаҳру ноҳияҳои вилоят дар олимпиадаҳои ҷумҳуриявӣ ва байналмилалӣ дар соли 2019 сазовори 255 ҷойи ифтихорӣ, аз ҷумла 51 медали тилло, 59 медали нуқра ва 145 медали биринҷӣ гардиданд, ки нисбат ба соли 2018 72 ҷойи ифтихорӣ зиёд мебошад.

Ин нуктаро раиси вилояти Хатлон Қурбон Ҳакимзода зимни суханронии худ машварати августии омӯзгорони вилоят ёдовар шуд, ки дар толори Театри вилоятии мусиқии мазҳакавии ба номи Ато Муҳаммадҷонови шаҳри Бохтар  баргузор гардид. 

Қабл аз оғози машварат намоиши дастовардҳои толибилмони вилоят дар соҳаи варзиш, навоварию ихтироъкориҳо ва дастони моҳири хонандагон ба намоиш гузошта шуда буд.

Раиси вилояти Хатлон Қурбон Ҳакимзода дар ҷамъомад зикр намуд, ки баҳри вусъат бахшидани амалигардонии барномаҳои давлатии марбут ба соҳаи илму маориф, баланд бардоштани сатҳу сифати таълиму тарбия, мустаҳкам кардани заминаҳои моддӣ-таълимӣ ва техникии муассисаҳои таълимии вилоят корҳои муайян ба анҷом расонида шудааст.

Ҳамчунин дар ин чорабинӣ як қатор озмунҳои соҳавӣ ба монанди «Беҳтарин муассисаи таълимӣ», «Беҳтарин муассисаи томактабӣ», «Беҳтарин муаллими сол», «Беҳтарин мураббии сол», «Беҳтарин хонандаи сол» ва «Беҳтарин навовару ихтироъкори ҷавону навраси сол» натиҷагирӣ карда шуда, ғолибон бо Ифтихорнома ва Сипосномаҳои мақомоти иҷроияи ҳокимияти давлатии вилояти Хатлон ва низ 70 нафар толибилмони аълохони муассисаҳои таълимии миёнаи умумии шаҳру ноҳияҳои вилоят ба маблағи 2000 сомонигӣ идрорпулии раиси вилоят сарфароз гардонида шуданд. 

Ҳамчунин раиси вилоят баҳри ҳалу фасли камбудиҳои ҷойдошта ба масъулин дастуру супоришҳои мушаххас дод.