Дар марҳилаи пуртазод ва дигаргуншавӣ, задухӯрдҳои пайи ҳам ва таҳдидҳои терроризму ифротгароӣ ҷомеаи ҷаҳониро беш аз ҳарвақта ба ташвиш овардааст. Ҳолати ноором ва хавфноки кишварҳои ҷангзада бори дигар собит месозад, ки ин амалҳо ба ҳадафи геосиёсии кишварҳои абарқудрат ва гурӯҳу созмонҳои манфиатхоҳ пайвастагӣ дошта, чун вабои аср дар сайёра доман афрохта, ба тамоми мавҷудоти замин таҳдиди зиёд дорад. Ҷумҳурии Тоҷикистон ҳамчун ҷузъи ҷудонашавандаи ҷомеаи ҷаҳонӣ дар самти мубориза бо тамоми зуҳуроти номатлуб саҳми назаррас нишон медиҳад. Аз соли 2021 инҷониб марҳилаи дуюми “Стратегияи муқовимат бо терроризм ва экстремизм дар Ҷумҳурии Тоҷикистон барои солҳои 2021-2025” тасдиқ гардид. Роҷеъ ба татбиқи стратегияи мазкур бо Юсуф Рӯзиев, прокурори Раёсати муқовимат бо терроризм, экстремизм ва назорати иҷрои қонунҳо дар самти амнияти миллии Прокуратураи генералӣ суҳбат намудем.

-Амнияти иттилоотӣ яке аз ҷузъҳои таркибии амнияти давлату миллат ба ҳисоб меравад. Имрӯз метавонем бигуем, ки амнияти иттилоотӣ ва амнияти сиёсии кишвар пурра таъмин аст ва ҳеҷ хатару таҳдиде наметавонад ба он осеб расонад?

-Дар асоси барномаи миллии нақшаи амалҳо доир ба амалишавӣ ва иҷроиши бандҳои “Стратегияи муқовимат бо экстремизм ва терроризм дар Ҷумҳурии Тоҷикистон барои солҳои 2021-2025” сохторҳои марбута муваззаф гардиданд, ки яке аз ин бандҳо ба амнияти иттилоотӣ мансуб мебошад. Бо мақсади иҷроиши стратегия сохторҳои муваззаф, ки намояндагони Прокуратураи генералӣ мебошанд, дар ҳамбастагӣ бо Хадамоти алоқаи назди Ҳукумати Ҷумҳурии Тоҷикистон, ҷиҳати пешгирии шомилшавии шаҳрвандон ба ҳизбу ҳаракатҳои террористию экстремистӣ ба воситаи шабакаи интернет ва маҳдуд кардани дастрасии онҳо ба сомонаҳои мамнуъшударо чораҷӯӣ доранд. Ба пуррагӣ наметавонем, бигӯем, ки амнияти кишварро ҳеҷ таҳдиде наметавонад таъсиргузор бошад. Чунки падидаи номатлуби терроризм ва экстремизм дар саросари ҷаҳон реша давонда ба амнияти дилхоҳ давлат метавонад, осеб расонад.

- “Стратегияи муқовимат бо экстремизм ва терроризм дар Ҷумҳурии Тоҷикистон барои солҳои 2016-2020” чӣ натиҷа дод ва дубора роҳандозӣ намудани он барои солҳои 2021-2025 чӣ зарурат дошт?

- Дар тӯли панҷ соли иҷроиши стратегияи қаблӣ ба дастовард ва натиҷаҳои зиёд ноил гардидем. Бевосита дар асоси санади барномавии миллии стратегия, санадҳои зиёди барномаи миллиро дар сатҳи Ҳукумат қабул намудем. Аз ҷумла, Консепсияи сиёсати давлатии Ҷумҳурии Тоҷикистон дар самти дин, Консепсияи милли муқовимат ба қонунгардонии даромадҳои бо роҳи ҷиноятӣ ба даст омада, маблағгузории терроризм, маблағгузории паҳнкунии силоҳи қатли ом ва дигар ҳуҷҷату санадҳои барномавии миллие, ки дар ҳамбастагӣ бо стратегияи мазкур алоқамандӣ доштанд, қабул гардиданд.

Новобаста аз оне, ки гаравидани шаҳрвандон ба ҳизбу ҳаракатҳои ифротӣ коҳиш ёфтааст, мо бояд ба ин қаноат накунем ва барои сулҳу суботи шаҳрвандон ва амнияти кишвар ва минтақа пайваста муқобили ин падидаи номатлуб мубориза барем. Бинобар сабаби нобуд сохтани ин вабои аср зарурати дубора роҳандозӣ намудани стратегияи мазкур барои панҷ соли минбаъда пеш омад.

- Дар стратегияи мазкур чӣ гуна роҳҳои муосири муқовимат бо терроризм ва экстремизм тарҳрезӣ гардиданд ва то чӣ андоза метавон гуфт, ки амалигардии стратегияи мазкур хавфи терроризму ифротгароиро дар кишвар аз байн мебарад?

- Дар банди 8-и стратегияи мазкур барои баланд бардоштани самаранокии чораҳои муқовимат ба истифодабарии интернет бо мақсадҳои террористию экстремистӣ ҷой дода шудааст. Яъне андешидани тадбирҳои иловагӣ доир ба тақвияти истифодабарии имкониятҳои интернет ҷиҳати шарҳи сиёсати давлатӣ дар соҳаи муқовимат бо экстремизм ва терроризм, пешбурди ташвиқоти васеи зиддиэкстремистӣ ва фаъолияти профилактикӣ дар ин соҳа мебошанд. Сомонаи давлатӣ ҷиҳати миёни аҳолии кишвар интишор намудани иттилоот оид ба қонунгузорӣ, барнома, стратегияҳо ва амалиёти муқовимат бо экстремизм ва терроризм фаъолият менамояд. Инчунин видеороликҳои кӯтоҳ оид ба хавфи ташкилотҳои террористию ифротгароӣ омода намуда, дар телевизиону шабакаҳои иҷтимоӣ пахш мегардад.

- Имрӯз мухолифини кишвар аз сомонаҳои иҷтимоӣ ба таври густурда истифода бурда, бо ҳар гуна туҳмату буҳтон амнияти кишварро халалдор кардан мехоҳанд. Ҷиҳати пешгирии чунин амалҳои ташкилоту созмонҳои манфиатҷӯй аз ҷониби ҳукумати кишвар ва мақомоти дахлдор то ин муддат чӣ гуна тадбирҳо андешида шудаанд?

- Мо - намояндагони мақомоти ҳифзи ҳуқуқ тамоми кӯшишҳоро равона сохта, ҷавобан ба иттилооти норӯшан ва носаҳеҳи мухолифин тариқи гурӯҳҳои тарғибгари манфиатҳои давлатӣ, маълумот ва хабарҳои саҳеҳро дар сомонаҳои иҷтимоӣ барои шаҳрвандон интишор месозем. Имрӯзҳо теъдоди зиёди ҷиноятҳои содиршуда тавассути шабакаҳои иҷтимоӣ ба амал меояд. Аъзои фаъоли ташкилотҳои террористи экстремистии Гурӯҳи-24, Паймони миллии Тоҷикистон ва Ҳизби мамнуи наҳзати ислом бештар дар шабакаҳои иҷтимоӣ бар зидди Ҳукумати Ҷумҳурии Тоҷикистон ҳар гуна маълумоту иттилооти бардурӯғ ва носаҳеҳро паҳн намуда, бо ин васила сохти конститутсионии Тоҷикистонро тағйир додан мехоҳанд. Мо ба воситаи мутахассисони махсуси соҳаи технология ва ташаббуси кормандони фаврии мақомоти ҳифзи ҳуқуқ барои муайян сохтани шахсияти нафароне, ки дар шабакаҳои интернетӣ аз саҳифаҳои сохта (фейкӣ) истифода бурда, Тоҷикистон ва Ҳукумати кишварро дар арсаи байналмилалӣ сиёҳ месозанд, фаъолияти оперативӣ-ҷустуҷӯи бурда, шахсияти аксарияти онҳоро маълум менамоем.

- Дар замони пуртазод ва тағйирёбанда чолишҳои пайи ҳам ва таҳдидҳои ифротгароӣ ҷомеаи ҷаҳониро ба ташвиш оварда, мувофиқи як маълумот имрӯз зиёда аз 150 созмону ташкилотҳои террористии байналмилалӣ фаъолият менамоянд. Ба андешаи шумо омили афзоиш ёфтани ин зуҳуроти номатлуб дар чист?

- Дар замони муосир омилҳои афзудани падидаи номатлуби терроризм зиёд мебошанд. Яке аз ин омилҳо норозӣ будани бархе аз шаҳрвандон нисбат ба ҳукумати кишварҳояшон аст. Омили дигар сӯистифода намудан аз дини мубини ислом буда, онҳо гӯё ба он пайравӣ менамоянд. Надоштани тасаввуроти муайяни дунявию динӣ низ боиси афзудани терроризм дар сайёра мегардад. Иловатан аз савияи дониш ва илму маърифат қафо мондани бархе аз шаҳрвандон боиси афзудани ташкилоту равия ва гурӯҳҳои муайян буда, мақсади онҳо содир намудани амалҳои экстремистӣ ва тағйир додани сохти конститутсионии давлатҳост. Истифодаи нодурусти шабакаҳои иҷтимоӣ дар шароити кунунӣ ҳам боиси ба роҳи хато рафтани бархе аз шаҳрвандон шуданаш мумкин. Надонистани қонунҳои амалкунандаи кишвар ва ҳуқуқҳои хеш низ боиси афзоиш ёфтани терроризму экстремизм мегардад. Дар тамоми чорабиниҳои ташвиқотие, ки аз ҷониби Раёсати муқовимат бо терроризм, экстремизм ва назорати иҷрои қонунҳо дар самти амнияти миллӣ дар вазорату идораҳо ва муассисаҳои таҳсилоти миёнаю олии кишвар гузаронида мешавад, пеш аз ҳама мо - намояндагони мақомоти ҳифзи ҳуқуқ ба шаҳрвандон баён месозем, ки онҳо бояд қонунҳои Ҷумҳурии Тоҷикистонро омӯзанд. Шахсони масъул ҳар як моддаи Кодекси ҷиноятии Ҷумҳурии Тоҷикистонро, ки маҳз барои амалҳои террористию экстремистӣ муайян карда шудаанд, тариқи вохӯрӣ ва чорабиниҳои ташвиқотӣ ба шаҳрвандон фаҳмонанд.

- Тибқи як банди стратегияи мазкур дар қаламрави мамлакат миёни қишрҳои гуногуни ҷомеа бояд конфронсу ҳамоишҳои илмию маърифатӣ баргузор шавад. То ин муддат ҷиҳати пешгирии гаравидани шаҳрвандон, бахусус ҷавонону наврасон ба ҳар гуна ҳизбу ҳаракатҳои ифротӣ вохӯрию ҳамоишҳо чӣ гуна ҷараён гирифт?

- Давоми панҷ соли амалишавии стратегияи қаблӣ конфронсу ҳамоиш, мизҳои мудаввар ва вохӯрию чорабиниҳои тарғиботӣ ташвиқотӣ миёни аҳолии кишвар баргузор гардида буд, ки натиҷаи қаноатбахш дод. Ҳар як ниҳод, аз ҷумла, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон, Прокуратураи генералӣ, Вазорати корҳои дохилӣ, Кумитаи давлатии амнияти миллӣ ва Маркази тадқиқоти стратегии назди Президенти Ҷумҳурии Тоҷикистон дар навбати худ вохӯриҳои зиёди маҷозӣ ва ғайримаҷозӣ баргузор намуда буданд. Дар марҳилаи дуюми амалишавии стратегияи мазкур ҳолати иҷроиши он дар соли якум аз моҳи июни соли 2021 инҷониб хуб буда, силсилаи чорабиниҳо баргузор гардида, аксари қишрҳои ҷомеа аз зуҳури падидаҳои номатлуб дар ҷаҳон ва таҳдиди онҳо ба кишвари мо ба хуби огоҳӣ пайдо намуданд. Умед аст, тадбирҳои андешидашуда ва роҳандозии стратегияи мазкур баҳри пешгирии шаҳрвандон, бахусус нав-расону ҷавонон, аз шомилшавӣ ба ҳар гуна ҳизбу ҳаракатҳои ифротӣ самари нек ба бор меорад.