Гирифтани ваксина зарур аст

Дар саросари ҷаҳон хурӯҷи навъи нави коронавирус дигарбора доман паҳн кардааст. Вале дар Ҷумҳурии Тоҷикистон гирифторони коронавирус ин бемориро сабук пушти сар мекунанд ва дар шароити хона табобат мегиранд. Бино ба иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар як шабонарӯз (25.01.2022) дар кишвар 26 ҳолати нави гирифторшавии шаҳрвандон ба бемории коронавируси нави COVID-19 ба қайд гирифта шуд.

Ба иттилои манбаъ, дар маҷмӯъ, аз аввали хурӯҷи ин беморӣ то имрӯз дар кишвар 17 ҳазору 180 нафар гирифторони сирояти COVID-19 ба қайд гирифта шуда, аз ин шумора то имрӯз 16 ҳазору 971 нафар (98,9%) шифо ёфтаанд.

Сардори Раёсати амнияти тандурустии Вазорати тандурустӣ ва ҳифзи иҷтимоии аҳолӣ Наврӯз Ҷаъфаров иттилоъ дод, ки айни ҳол вазъи коронавирус дар кишвар таҳти назорат аст.

“Аз сабаби он ки бештари аҳолии кишвар ваксина гирифтаанд, беморӣ сабук мегузарад”,- афзуд манбаъ.

Номбурда дар мавриди вуҷуди навъи нави коронавирус - омикрон дар кишвар гуфт, ҳоло онро муайян карда наметавонанд.
Ба гуфтаи ин масъули вазорат, дар кишвар тест ва дастгоҳи муайянкунандаи омикрон ҳоло вуҷуд надорад. “Ҳоло корҳо дар самти ворид кардани тест ва таҷҳизоти муайянсозии омикрон идома дорад. Он ба наздикӣ ворид карда мешавад”,- афзуд манбаъ.

Ӯ илова кард, ки ин дафъа коронавирус тариқи шаҳрвандони аз Русия, Қазоқистон ва Ӯзбекистон омада, ворид гардидааст. Дар ҳамин ҳол барои пешгирӣ аз паҳншавии беморӣ чораҳои беҳдоштӣ ва назоратӣ дар кишвар сахттар шудааст.

Бо рӯ задани мавҷи нави коронавирус дар Тоҷикистон аллакай гузаронидани вояи сеюми ваксина шурӯъ шуд ва он то ба ҳол идома дорад. Ба гуфтаи Наврӯз Ҷаъфаров, раванди ваксиназанӣ дар кишвар дар ҳолати хуб қарор дорад ва то кунун 4 млн 355 ҳазору 582 нафар шаҳрвандон эм шудаанд.
Гирифтани вояи сеюми ваксина аз табибон оғоз шуда, пас аз он омӯзгорон, кормандони идораҳои давлатӣ, солмандон ва нафароне, ки бемориҳои музмин доранд, эм карда хоҳанд шуд.

То ба имрӯз дар Тоҷикистон бар зидди коронавирус сокинон бо ваксинаҳои “Sputnik V,” “AstraZeneca”, “CoronaVac”, “Moderna” ва “Pfizer” эм шудаанд.
“Осебпазирии омикрон аз антителаҳо дар муқоиса бо осебпазирии навъи аввали COVID -19 ҳудуди 7 баробар кам будаасту дар муқоиса бо осебпазирии делта чор баробар”, - навиштаанд пажӯҳишгарон.

Мутахассисон барои сокинони кишварҳое, ки аз ваксинаҳои чинӣ истифода кардаанд, маслиҳат додаанд, ки дубора ваксина гиранд. Маврид ба зикр аст, ки CoronaVac эҳтимолияти гирифторӣ ба коронавирусро 50,4% ва хатари маргро 94% кам мекунад.

Феълан истифодаи ин ваксина дар беш аз 50 кишвари ҷаҳон, аз ҷумла Тоҷикистон низ иҷозат дода шудааст, ки ахиран ҳудуди 3 миллион вояро дастрас намуд.
Пизишкон ба сокинони кишвар тавсия медиҳанд, ба ҷуз бастани ниқоб, риоя намудани фосилаи иҷтимоӣ, шустани дастон ва зуд-зуд ҳавои хонаро тоза кардан, сокинон ҳамчунин бояд ҳатман ду воя ваксина бигиранд, ки роҳи асосии пешгирии беморист, чун ин навъи ҷадид хеле зуд паҳн мегардад.
“Шахсоне, ки ваксина назадаанд, ҳарчи зудтар рафта ваксина зананд ва омодагии худро барои бори севвум гирифтани он бигиранд”,- тавсия дод коршиноси риштаи вирусшиносӣ Ораш Алоӣ.

Ораш Алоӣ ба мардуми Тоҷикистон тавсия медиҳад, ки барои табобати бемории коронавирус, аз ҷумла, дар ҳолати муайян шудани навъи ҷадиди он “омикрон” аз доруҳои антибиотикӣ ва зиддивирусӣ истифода набаранд, чун ҳеҷ кумаке нахоҳанд кард.

“Дар ҳолати тасф доруи “паратсетамол” ва доштани сулфа дору барои сулфаро истеъмол намоянд. Дар ҳолате, ки зуд-зуд нафас мекашанд, хастагиро эҳсос мекунанд ва кабудшавӣ доранд, ҳатман ба беморхона муроҷаит намоянд”, - гуфт номбурда.

Айни замон дар Тоҷикистон зукоми мависимӣ дар гардиш аст ва тавре мутахассисон ҳадс мезананд, навъи ҷадиди “омикрон” низ ба зуком шабоҳат дошта, бархе мардум баъди натиҷаи мусбати ташхисҳояшон ба худдармонӣ машғул шуда, бо антибиотикҳо табобат мекунанд.