Имрӯз ба ифтихори 35 солагии Истиқлолияти давлатии Ҷумҳурии Тоҷикистон дар деҳаи Бағуи ноҳияи Рӯшон як майдончаи варзишӣ ва бунгоҳи тиббӣ сохташуда ба истифода дода шуд.

Дар ин бора аз Бахши кор бо ҷавонон ва варзиши ноҳияи Рӯшон хабар доданд.

Дар ифтитоҳи ин иншоотҳо Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Аҳтам Абдуллозода, сардори Сарраёсати сирри давлатии назди Ҳукмати Ҷумҳурии Тоҷикистон ва Илҳом Аҳмадзода, раиси ноҳияи Рӯшон иштирок ва суханронӣ намуданд.

Нахуст раиси Кумитаи ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода аҳли ҷамъомадагон ва ҷавонони деҳаро ба муносибати соҳиб гаштани ба ин иншоотҳои наву замонавӣ муборакбод гуфта, ҷавонони ноҳияро ба он даъват намуд, ки дар рушди варзиш саҳмгузор бошанд ва пачамбардори мусобиқаҳои вилоятӣ, ҷумҳуриявӣ ва байналмилалӣ бошанду обрӯву эътибори давлати ҷавонони тоҷикро дар арсаи байналмилалӣ боло бардоранд.

Сипас ҷавонони фаъол ва варзишгарони ноҳия бо ифтихорномаву туҳфаҳои хотиравии Кумитаи кор бо ҷавонон ва варзиши назди Ҳукумати Ҷумҳурии Тоҷикистон сарфароз гардонида шуданд.

Наҷиба МУРОДБЕКОВА, “ҶТ”