ҶОМЕА
Ҷумъа 20 Май 2022 08:59
8510
Орзу ва амал инсонро ба кӯйи муроду мақсад мерасонад. Ҳар нафаре, ки ҷодаеро интихоб карда, дар роҳи расидан ба он ҷидду ҷаҳд менамояд, ҳатман комёб мешавад. Қаҳрамони мо низ новобаста аз имконияти маҳдуд доштан, пешаи китобдориро ихтиёр намуда, аллакай ҳамчун мутахассиси соҳа байни ҳамкасбон мавқеъ пайдо кардааст.

АЗ РӮҲАФТОДАГӢ ТО КОМЁБИҲОИ БЕШУМОР

Наимҷон Мараҷабов сардори шуъбаи мушовирони китобхонаи системаи марказонидашудаи ноҳияи Бобоҷон Ғафуров аст. Ӯ 15 сол мешавад, ки дар ин боргоҳи илму адаб адои вазифа менамояд. Инҷо ҳама ӯро эҳтиром мекунанд ва доир ба масъалаҳои соҳа машварат мепурсанд.

Дар чунин муҳити созгор Наимҷон ҳеҷ гоҳ танҳоиро эҳсос намекунад. Бо вуҷуди он ки бо мушкилӣ роҳ мегардад, аммо аз ин ҳадяи тақдир рӯҳафтода нест.
-Шахсе, ки андешааш, афкораш ва дидгоҳаш носолим аст, ӯро маъюб гуфтан мумкин. Ман асло худро маъюб намеҳисобам. Зеро ақли солим дорам,- мегӯяд қаҳрамони мо.

Ӯ мутахассиси ботаҷриба ва мушовири баландихтисос аст. Пешравии соҳаи китобдорӣ дар ноҳия маҳз аз кордонии ӯ сарчашма мегирад. Ин аст, ки китобхонаи онҳо борҳо дар сатҳи вилояту ҷумҳурӣ беҳтарин эътироф шудааст. Аз ҷумла, соли 2016 замони директори хонаи маданияти ноҳияи Бобоҷон Ғафуров будан, дар даври вилоятии озмуни ҷумҳуриявии “Беҳтарин муассисаи фарҳангӣ” сазовори ҷойи 1-ум, солҳои 2019 ва 2020 дар даври вилоятии озмуни “Китобхонаи беҳтарин дар соҳаи технологияи муосири иттилоотӣ” барандаи ҷойи аввал гаштааст.

ШИКАСТ ОҒОЗИ ДИГАР АСТ...

Қаҳрамони мо аз хурдӣ ҳангоми роҳгардӣ азият мекашид. Чун ҷисмаш маълул буд, гоҳо рӯҳафтода мешуд, ки мисли дигарон нест. Аммо чун волидайн ҳамвора дастгирӣ мекарданд, эҳсоси нобоварӣ ва аз дигарон кам будан аз вуҷуди ӯ дур мерафт.

-Гоҳо дар танҳоӣ эҳсос менамудам, ки дигарон аз ман як сару гардан болотаранд. Чун ҷисми солим доранд ва озодона роҳ гашта метавонанд. Вале вақте ба воя расидам, фаҳмидам, ки солимӣ танҳо дар дасти гирову пои равон доштан нест,-мегӯяд Наимҷон.

Дар ҷомеаи мо нисбати шахсони дорои имконияташон маҳдуд гоҳо хунукназарӣ ба назар мерасад, ки чунин тарзи муносибат то ҷое рӯҳияи онҳоро мешиканад. Аммо қаҳрамони мо, ки иродаи қавӣ дошт, ҳар шикастро чун оғози дигар қабул мекард.

Ӯ баъди хатми мактаби миёна ба Донишгоҳи давлатии Хуҷанд ба номи академик Бобоҷон Ғафуров дохил шуда, соли 2007 ин боргоҳи илму донишро бо ихтисоси муҳандис-иқтисодчӣ ба итмом расонид. Бо даъвати бахши кор бо ҷавонон ва варзиши ноҳияи Бобоҷон Ғафуров ҳамчун мудири шуъбаи иҷтимоӣ-фарҳангӣ ва кор бо ташкилотҳои байналмилалӣ фаъолияти хешро оғоз намуд. Ӯ чанд муддат дар ин вазифа кор карда, баъдан китобдори китобхонаи марказии бахши фарҳанг таъин шуд.

Давоми солҳои гуногун вазифаи мудири шуъбаи мубодилавӣ-захиравӣ ва депозитарии китобхонаи марказӣ ва директори хонаи маданиятро ба ӯҳда дошт.
-Касби хешро дӯст медорам, зеро ба махзани дониш роҳ кушодан кори савоб аст. Ҳар яки мо, новобаста аз имкониятҳо, бояд барои халқу миллат хизмат кунем,-мегӯяд ӯ.

ВАҚТЕ ОИЛА МУТТАКОСТ

Наимҷон Мараҷабов соҳиби оилаи некӯ ва ду фарзанди дӯстрӯ аст. Ӯ аз он меболад, ки Офаридгор чунин неъмати бебаҳоро ба ӯ низ насиб гардонидааст.
-Масъалаи хонадоршавӣ ба шахсони маълул каме муташанниҷ аст. Зеро андешаи мардум нисбати чунин ашхос ба тағйироти ҷиддӣ ниёз дорад. Бархе гумон мекунанд, ки аз оилаи маълул айнан чунин фарзанд ба дунё меояд, аммо ин тавр нест. Оилаҳоеро медонам, ки соҳиби фарзандони солиманд, аз ҷумла оилаи ман низ,-афзуд Наимҷон.

Қаҳрамони мо шукронаи сулҳу оромии кишвар карда, изҳори шодмонӣ мекунад, ки дар Ватани азизамон ҳама баробар ҳастанд. Касе нисбати касе бартарият надорад. Чунин шароити мусоид имкон фароҳам оварда, ки ҳама ба кору таҳсил фаро гирифта шаванд.

-Вақте ба хостаҳои хеш мерасед, инсон ба зиндагӣ дилгарм мешавад. Шукрона мегӯям, ки ҳамаро дорам, ҳам оила, ҳам фарзанд, ҳам волидайн ва ҳам ҷои кор. Дуои неки волидайн ва суханҳои ҷонбахши фарзандонам қуввати дили мананд. Вақте аз ҷониби онҳо дастгирӣ эҳсос мекунам, тану ҷонам даҳчанд қувват мегирад. Оила муттакои асосиест, ки ба он такя мекунам ва неру мегирам,-иброз дошт ӯ.

ХИСЛАТИ НЕК-НИСФИ ПЕШРАВӢ

Аксарияти шахсони дорои имконияти маҳдуд камгап ва зудранҷ ҳастанд, аммо Наимҷон Мараҷабов ин гуна нест. Ӯ зиндадил, болидарӯҳ, хушгап ва аз ҳама муҳим дилёб аст. Нисбати кор серталаб буда, саҳлангориро дӯст намедорад ва ҳамеша аз он дурӣ меҷӯяд.

-Вақте ҳамкоре дар иҷрои кор саҳлангорӣ мекунад, дилтанг мешавам. Бояд нисбати кор дилсӯзона муносибат кард. Одам бо ин гуна хислатҳо пеш намеравад,-мегӯяд ӯ.

Мавсуф иброз медорад, шояд хислати серталабӣ бошад, ки гоҳо байни ӯву кормандон ноҷӯрӣ меафтад. Аммо ин дер давом намекунад ва ба фоидаи кор ҳал мешавад.

-Наимҷон мутахассиси соҳа аст. Аз ин рӯ, ҳамаи тавсияҳояш ба фоидаи кор ҳастанд. Ягон роҳбар намехоҳад, ки корманди беҳтаринашро аз даст диҳад. Мо низ пешравиҳои ӯро ба назар гирифта, кӯшиш мекунем, ки зина ба зина ӯро ба вазифаи баланд гузорем,-иброз дошт, директори Китобхонаи системаи марказонидашудаи ноҳия Инобат Турдиева.

Воқеан, Наимҷон дӯстдору фидоии касби хеш аст. Маҳз ин хислати некаш боис гаштааст, ки чанд маротиба аз ҷониби китобхонаи марказӣ, ҳукумати ноҳия, бахш, раёсат ва Вазорати фарҳанг бо ифтихорнома ва сипоснома қадрдонӣ гардад. Соли 2019 барои хизматҳо дар рушди соҳаи фарҳанг бо нишони сарисинагии “Аълочии фарҳанги Ҷумҳурии Тоҷикистон” сарфароз гардидааст. Ин ҳама аз меҳнатдӯстӣ, фидокорӣ ва дилсӯзии Наимҷон нисбат ба касбаш далолат медиҳад.
-Вақте меҳнататро қадр мекунанд, хушҳол мешавӣ ва даҳчанд заҳмат мекашӣ. Аз оила ва ҳамкорон сипосгузорам, ки маро дарк мекунанд ва дастгирӣ менамоянд. Кӯшиш мекунам, ки баҳри халқ хидмат намоям,-афзуд қаҳрамони мо дар фарҷом.

Наимҷон Мараҷабов намунаи инсонест, ки рӯзгораш барои шахсони ҷисман солим, вале ноумеду дилшикаста намунаи ибрат аст.

Амони МУҲАММАД, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.