Дар пайи тасмимҳои ахири роҳбарияти Федератсияи футболи кишвар барои дастгириву ҳавасмандгардонии варзишгарон Корхонаи заршӯии муштараки Тоҷикистону Чин – “Зарафшон”, ки ба истихроҷи тиллову нуқра машғул аст, ваъда дод, ки ба тими миллии Тоҷикистон барои роҳ ёфтан ба даври чаҳорякниҳоии Ҷоми Осиё -2023 2 миллион сомонӣ туҳфа мекунад.

Роҳбарияти ин ширкат, изҳор доштааст, ки дар сурати ба даври нимниҳоӣ роҳ ёфтани мунтахаби Тоҷикистон 3 миллион сомонӣ, барои ба финал баромадан 5 миллион сомонӣ ва барои дарёфти Ҷоми мусобиқа, 8 миллион сомонӣ ҷудо хоҳад кард.

Ёдовар мешавем, ки чанде қабл Президенти Федератсияи футболи Тоҷикистон, муҳтарам Рустами Эмомалӣ дастаи мунтахаби кишварро барои муваффақиятҳояшон дар Ҷоми Осиё - 2023 дар Доҳа ба маблағи 450 ҳазор доллар (ҳудудан 5 миллион сомонӣ) қадрдонӣ карда буд. Гуфта мешавад, ҳамчунин дар сурати пирӯзиҳои минбаъда дар Ҷоми Осиё-2023 ба мунтахаби Тоҷикистон мукофотҳои калон тақдим карда хоҳад шуд.

2 феврал дар даври чорякниҳоӣ миллипӯшони кишвар бо тими миллии Урдун бозӣ мекунад ва дар сурати пирӯзӣ бар тими миллии Урдун мунтахаби Тоҷикистон аз ҷониби ФФТ 200 ҳазор доллари иловагӣ ба даст хоҳад овард.

Ёдовар мешавем, ки мунтахаби Тоҷикистон барои аввалин бор дар таърихи худ дар қисми ниҳоии Ҷоми Осиё ҳунарнамоӣ дорад ва бо роҳ ёфтан ба даври чорякниҳоии мусобиқот аллакай дастоварди шоёнро дар таърихи варзиши кишвар сабт намуд.